Khalid-a'n India U23 enkawl mai thei

All India Football Federation chuan Khalid Jamil chu India Under-23 enkawl turin an sawm a, Indian coach ṭha ber anga tam takin an ngaih hian thutlukna a la siam fel lo.

Asian Games 2025-ah India hian football team tirh a tum a, Games-ah hian Under 23 team tirh ṭhin niin, kum 23 chung lam player pathum an tel ve thei bawk - he inelnaah hian AIFF chuan Khalid-a enkawlna hnuaiah India U23 hi khel se an duh.

Hei chauh a ni lo - 2026 AFC Under-23 Asian Cup qualification-ah India hi an inlan dawn bawk a, AIFF hian Khalid-a kaihhruaina hnuaiah India hian hma taka inbuatsaihna kalpui an duh a ni.

Khalid hian season hman zawh takah khan Jamshedpur chu ISL semifinal a hruai thleng a, Super Cup-ah final an lut bawk. Kar hmasa lawk khan AIFF chuan Coach of the Year-ah an thlang.

India coach Manolo Marquez chuan, "Result aṭanga ka teh a nih chuan ani aia Indian coach ṭha zawk an awm rih lo. A team a khelhtir dan chu miin an duhin, an duh lo thei a, mahse, coach ṭha a nihzia chu result-in a nemnghet a ni.

"Aizawl FC tan I League champion a ni a, NorthEast United a enkawl laiin ISL playoff a hruai thleng a, tun season-ah JFC chu semifinal a kaipui leh bawk - budget nei tam lo club tan a thawk ṭhin a, a hnathawh a ṭha hle," a ti.

Khalid hian India U23 a enkawl a nih chuan Men of Steel a chhuahsan a ṭul dawn tihna a ni a, Jamshedpur CEO Mukul Choudhari chuan, "AIFF lamin min rawn be tawh a, mahse, thutlukna siam a la awm lo.

"Khalid-a duhthlannaah kan innghat a, aman thutlukna chu a siam ang. A kaihhruaina hnuaia kan hun tawnte kha ropui kan tihle a ni," a ti a, an coach thutluknaah an innghah thu a sawi.