MIZBA leh Thlik Thlok thawk ho dawn

Mizoram Boxing Association (MIZBA) leh Thlik Thlok Entertainment & Charity Network (Thlik Thlok) te chuan nimin khan Mizorama boxing chawilar zual tur leh boxer-te tana hamṭhatna nasa zawk siam turin thawhhona thuthlung an ziak.

Thawhhona thuthlung avang hian MIZBA-in boxing competition a kalpuiah kum sarih chhung chu prize money a awm dawn. MIZBA president C. Lalṭanpuia chuan, “Kan thawhhona hian boxer te a tihphur a, boxer zingah inelna leh thawhrimna nasa zawk a awm dawn avangin boxing nasa zawkin hma a sawn ka beisei a ni. Mizoram sorkarin Olympic 2036-a kan ṭhalai tam tak te an telna tura a ruahmanna kalpui lai ‘Vision 2036’ tihhlawhtlin tuma ke kan penna kawngah nasa takin a pui dawn," tiin a sawi.

MIZBA hian Thlik Thlok nena thawk dun hian kumin August thla hian boxing inelna lian Golden Ring buatsaih an tum a, Thlik Thlok hian MIZBA hnuaia inelna te live-in a pe chhuak dawn. Thawhhona hi amateur boxing khelte tan chanchin lawmawm a ni.