Celtics lakah Knicks chak hmasa

Boston Celtics chu chak tura rinkai leh buk rit zawk ni mah se, nimin zinga NBA Conference Semifinal game 1 an khelhah New York Knicks an ngam lo.

Eastern Conference semifinal hi best of seven series hmangin chak zawk zawn a ni dawn, match hmasa berah Knicks hi 108-105 in an chak, conference finals lut tur erawh chuan a tlem berah pawh vawi li tal an chak a ngai dawn a ni.

Knicks an chak theih nan Jalen Brunson leh OG Anunoby te an langsar a, point 29 ve ve an nei. Quarter thumna an khelh laiin point 20 ngawtin a hniam zawk ni mah se, a tawpah an tho chhuak.

Knicks coach Tom Thibodeau chuan, "Ka naute hian season tluanin huaisen takin an bei a, tun ṭumah pawh khan dinhmun hniam leh duhawm lo takah kan ding hman, mahse match dang ang bawkin a tawpah chuan kan huaisen rah kan seng," tiin a sawi.

Western Conference semifinal lamah pawh, regular season laia chungnung ber Oklahoma City Thunder chu Denver Nuggets lakah 121-119 in an chak lo phawt a, game 2 an khelh hunah thawh chhuah leh nghal an tum ang.

Thunder coach Mark Daigneault chuan, "Chesual thei reng kan ni tih a takin kan hmu leh ta a, tun ṭuma kan chak lohna aṭang hian insiamṭhat nghal kan tum ang, series a ni tih kan hriat nawn a ngai," a ti.