Real leh Ancelotti inrem

Carlo Ancelotti leh Real Madrid ten inremna thar an nei a, an inrem dan erawh chhuak turin a ni - Italian coach ropui hian Santiago Bernabeu-ah season khat atan contract la nei mah se, season tawpah Spanish club hi a chhuahsan dawn a, a thuphung chuan an inrem tawh.

Khawthlang media-te tarlan dan chuan, Real hian season tawp hmain Ancelotti chhuah tur thu hi puan fel an tum a, Pathianni zana El Clasico an khelh zawhah an puang dawn niin an sawi.

Kum 65 mi coach hian December 2023 khan Real-ah hian contract thar a ziak a, a contract ang chuan kum 2026 thleng Santiago Bernabeu-a cham tur a ni.

Mahse, Real nen chhuak turin an inbe fel ta a, an inbiak rei chhan hi contract hmang zo loa chhuak tur a nih avanga zângnadawmna an inpek tur chungchangah niin an sawi.

Ancelotti hi seaosn tawp ruala Brazil enkawl nghal tura beisei a ni a, Brazilian Football Confederation (CBF) chuan Italian coach hi, "Kan President Ednaldo Rodrigues duhthusam a ni," tiin an sawi thlawt!

Italian coach hian Brazil-ah hian kum khat atan contract a ziak phawt ang a, World Cup 2026 thleng a kaihruai ang - June thlaa Ecuador leh Paraguay te nen World Cup qualifier an khelh hunah an ram club enkawl hman turin CBF chuan an beisei.

Ancelotti hian Saudi Arabia aṭangin sum tam tham tak hlawh tura sawmna a hmu a, a duh a nih chuan Madrid-ah hian non-coaching role chelh theihna dan a contract angin a nei tel bawk.

Mahse, kum 65 tlin hnuah pawh Ancelotti-a'n chona thar hmachhawn a la duh a, Brazil a pan dawn. Real hi June 2013 - May 2015 inkar kha lo enkawl tawhin, a enkawl hmasakah hian Champions League, UEFA Super Cup, FIFA Club World Cup leh Copa del Rey-ah te a champion pui.

June 2021 khan a vawi hnih nan Real-ah a kir a, La Liga (2), Copa del Rey, Supercopa de Espana (2), Champions League (2), UEFA Super Cup (2), FIFA Club World Cup leh FIFA Intercontinental Cup-ah te a champion pui leh thei - Real tan ani aia champion hnem coach an awm lo.

Real hian Bayer Leverkusen coach leh an player hlui, Xabi Alonso chu Ancelotti thlak tur hian lakluh an tum a, Alonso hi an la lut thei lo a nih chuan an club director of football Santiago Solari chu coach-ah an ruat dawn nia sawi a awm bawk.

Madrid khaw club-ah hian club legend, Real reserve team enkawltu Raul Gonzalez leh Real Under-19 enkawltu Álvaro Arbeloa an awm mek bawk a, anni pahnih hming pawh lam rik ni mah se, Alonso an la lut lo a nih chuan Solari a nih mai rinna a lian ber.

Solari hian Real hi October 2018 - March 2019 inkar kha a lo enkawl tawh a, FIFA Club World Cup-ah champion pui mah se, Champions League round of 16-ah Ajax hneh loa an tlak avangin an ban.

Real a chhuahsan hnuah Mexican club lar America a enkawl a, CONCACAF Champions League final hial hruai thleng mah se, March 2022 khan an ban.