Tuichangral lakah Anastasia an chak

EverHome Pro Volleyball League khelh mekah, tun hma lama team hriat hlawh Anastasia Electric Veng chuak chak ni hmel an hmu ta. Thawhṭan zan inkhelah Anastasia hian Tuichangral chu 18-25, 25-21, 25-23, 25-18 (3-1) in an hneh.

LPS Arena, Falkland-ah Anastasia hi a tirah an dinhmun a ṭha lo, an match hmasa ang bawkin tlawm nawn thei dinhmunah an ding, set an hloh hmasa a ni. Mahse, Yougank Baliyan chuan mawhphurna lanin, point 29 ngawt hlawh chhuakin a team a chakpui.

Anastasia hian kum 2019 May 9 daih tawh khan league round hnuhnung berah Thutak Nunpuitu Team an hneh a, chumi hnuah tun hi Pro Volleyball inkhela an chak leh hmasak ber niin kum ruk dawn hnuah anni aia rinkai Tuichangral an hneh.

League bul an tannaah khan Sihphir lakah 3-1 an tlawm a, hliam nei chunga khel Yougank chuan point nga hmuin point nga tho a paih a, an sawisel zui nasa angreng hle, mahse tunah chuan amah sawisel tute chu thil tih hmangin a chhanglet.

An boruak rit tak aṭangin Anastasia hi an tho chhuak tiin a sawi thei - Ningani zanah anmahni ang bawka bruak insiamṭha mek Thutak Nunpuitu Team an hmachhawn leh dawn a, inkhel a hmuhnawm ngei ngei ang.

Tuichangral tan Rajneesh Singh chuan point 28 hmuin 11 a hloh a, Johan Vanneihsanga'n ṭum 18 hlap tlain 11 a paih bawk. Zomuansanga'n beisei pha rih loin vawi 11 vaw tla mah se point 10 a hloh, an player langsar ten point an hloh tam.

Inhliam Lalbiakmuana tel lo in Tuichangral hi an khel a, an ṭhat dan tak a ni lo tih chu a chiang - an match hmabakah erawh tun aia ṭha zawkin inlan an tum ang, tihsual neih tlem a pawimawh dawn ta ni.