India aiawh tur David Lalremruata

Tun hnaia National Para Judo Championship-a Mizoram tihmingṭhatu David Lalremruata, West Serzawl chuan Astana, Kazakhstan lamah India aiawh turin IBSA Para Judo World Championship a khel dawn.

David-a hian India Camp hi April 23 khan a zawm a, ruahman dan chuan nimin khan camp an awmna Lucknow chhuahsanin, May 8-16 chhung awh tur 2025 IBSA Judo World Championship khel turin Kazakhstan khawpui Astana lam an pan dawn a ni.

David hian J1 Category Below 81 kg-ah a khel ang a, he weight category hi 2028 Paralympics cycle atana weight dah thar niin India aiawh hmasa ber tur a ni nghal bawk a ni.

Mizo tlangval hian championship a khelh theih nana sum leh pai a ṭanpuina pe tute zawng zawng chungah lawmthu a sawi a, hlawhtlinna a chan ngei theih nan ṭawngṭaipuiah min sawm bawk a ni.

Mizoram Blind Sports Association leh Mizoram Judo Association chuan David Lalremruata hi hlawhtlinna chang ngei turin duhsakna a hlan a ni.