Hunthar an chak ve ta

Champion lai Hunthar chuan EverHome Pro Volleyball League khelh mekah a vawi khat nan hnehna an chang. Thawhlehni zan khan tualchhung player chhawr rim chungin an khingpui Sihphir chu 19-25, 25-22, 26-24, 25-14 (3-1) in an hneh.

LPS Arena, Falkland-ah Hunthar hian thapui an thawh, an match hmasa pahnihah an tlawm avangin a zawna vawi thum chak loh chu malphona lian a tling. Hliam vangin Anurag Rawat an chhawr zui thei lo a, mahse Mizo hlanga khelin result ṭha an nei.

Set khatnaah Hunthar hi 16-15-a sang zawk an nih laiin Anurag chuan a vaw kai lo a, tla sualin a ke vei lam a rap sual a, a khel zui thei lo. Amah thlaktu Rohluzuala'n set hnihna aṭangin team a khai ding a, ṭum 15 hlap tlain point hnih chiah a hloh a, Kuriz Player of the Match atan an thlang.

League an khelh hmasak vawi hnihah Hunthar Mizo player-te an khel ṭha tawk lo. Sihphir lakah erawh inrintawkna thar nen an khel a, Rohlua bakah Lalramhluna'n point 13 hmuin vawi thum a tisual a, Laldampuia'n ṭum 12 vaw tlain point li a paih bakah net bula lehlam vuak dangtu Lalbiakmawia Khiangte chuan point 11 hmuin point ruk a hloh a ni.

Set an lak hmasak hnuah Sihphirin rin hlawh mah se beisei an phak lo zui. Tihsual an ngahin an khel a nghet tawk lo a, set thumnaah 24-23 a sang zawkin dinhmun duhawm luah leh zuai mah se an ṭang tlang zo lo.

Niyas Adbul Salam chuan point 34 hmuin 14 a hloh a, Khawbel an hneh loh ṭum aiin a khel ṭha zawk. Mahse, boruak sang leh rilru lama inelna nasaah Sihphir an khawng tawk lo. An hneh theih tur Hunthar lakah hun ṭha bawhpelha khelh hnih an tlawm zawn avangin an kawng a harsa zui dawn a ni.

Anastasia Electric Veng hneh thei tawh Sihphirin Zirtawpni zanah Thutak Nunpuitu Team an tum leh dawn a, semifinal lut turin chak an mamawh hle. Huntharin tun karah an khel tawh dawn lo a, kar leh Thawhṭanni zanah Tuichangral nen an inhmachhawn ve thung ang.