Paruknaah Djokovic

Mipa tennis thuneitu sang Association of Tennis Professionals (ATP) chuan world ranking thar a ti chhuak a, season hmang ṭha lo Novak Djokovic chu paruknaah a awm - Serbian star hi tun hnaiah hmasawn zawngin a kal thei lo.

Djokovic awmna hmasaah Jack Draper chu awmin pangana a ni a, kar hmasa maia khelh zawh tak Madrid Open-ah a chetṭhat avangin Britain tlangval hi hmasawn zawngin a kal thung a ni.

Madrid Open champion Casper Ruud chu a sang zual 10 zingah a inhlangkai. Norway tlangval hian a vawi khat nan Masters 1000 title a la a, Grand Slam final pawh vawi thum khel tawhin, French Open khelh turah pawh rinkai zinga mi a ni ang.

Hun rei tak inkhel thei lo mah se Jannik Sinner chu a chung berah a la awm chhunzawm. Italian tlangval hi damdawi hman phal loh a hmang tih hriatchhuah a nih avangin thla thum chhung inkhel thei lo tura hrem a ni.

Tunah chuan Sinner hian hrem a nihna a hmang zo tawh a, an rama inelna Italian Open a khel dawn. Italian Open hi clay court-a khelh ṭhin a ni a, a tan chuan inelna lian French Open inbuatsaihna atana ṭha tak a ni nghal ang.

Clay court inelna lian ber French Open hi May 25 aṭanga June 8 chhungin Paris khawpuiah khelh tur a ni.