Warriors leh Pacersan chak

NBA playoff khelh laiah nimin zing khan Golden State Warriors leh Indiana Pacers te chuan an khingpui ve ve an hneh a, awlsam taka chak erawh an ni bik lo thung.

Western Conference semifinal game 1-ah Golden State hian Minnesota Timberwolves chu 99-88 in an hneh. Warriors tan hian Buddy Hield (24 points) leh Jimmy Butter (20) te an langsar a, an thiampuipa Stephen Curry pawhin point 13 a nei bawk.

Best of seven series hmangin chak zawk zawn a ni a, tlang turin a tlem berah vawi li tal an chak a ngai. May 9, Zirtawpni zing dar 6:00-ah game 2 an khel leh dawn a ni.

Inkhel dangah Indiana Pacers chuan Cleveland Cavaliers 120-119 in an hneh. Team pahnih an inkhel tawk em em a, hun tawp hma second 1.1 chauh awm tawhah Tyrese Haliburton chuan 3-points vawm lutin Pacers a chakpui.

Conference semifinal-ah Pacers hian 2-0 in hma an hruai ta a, regular season hmang ṭha tak Cavs tan tho chhuak turin chetsual fo a remchang tawh lo. May 10, Inrinni zing dar 5:00-ah game 3 an khel leh ang.