Zemabawk North leh Lengpui Model an tla

LBS Suzuki 22nd Inter Branch YMA Football Tournament-ah team ṭha tura ngaih Zemabawk North-in first round an paltlang lo a, Lengpui Model pawh match hmasa berah an tla nghal.

Mualpui, ITI Vengin Zemabawk North 3-2 in an barakhaih. Zemabawk North-ah hian Aizawl FC player Samuel Lalmuanpuia leh Peter Lalrinhlua te an awm a, David Lalrinmuana enkawl niin team 128-ah an tel pha ta lo.

Lengpui Model hi team vantlang zinga mi tura ngaih an ni a, mahse an tiatpui Falkawn lakah 3-2 in an chak lo. Falkawn coach hi B. Zoramthara a ni a, Thara hi National Games-a Mizoram gold medal lakpuitute zinga mi kha niin kumin khan AIFF D Licence a nei thar bawk.

Kum 2005 champion Republic Vengin Zemabawk East lakah zahngaihna an lantir lo a, 16-0 in an sawp. Republic Veng hi Mizo coach ṭha Lalsangzuala Hmar enkawl an ni a, inelna kal meka insawp ber an la ni.

Kawnpui Venglai pawhin Ailawng 10-0 in an sawp a, Lalengmawia'n goal nga a khung. Engmawia hi National Games-ah khan Mizoram tan a khel a, nikuma Mizoramin Santosh Trophy semifinal an thlen ṭum khan a tel bawk. Serchhip Field Vengin Ramhlun Vengthar 7-0 in an sawp a, Mumbai City striker Daniel Lalhlimpuia'n hattrick a siam. Tun inelnaah Serchhip aiawh team an la khel ṭha hle.