Inkhelh hun sawnah Aston Villa lawm lo

Tottenham Hotspur chu Europa League final lut thei dinhmunah an ding a, hei vang hian Spurs leh Aston Villa ten Premier League an khelh tur chu a hun pangngai aia sawn hma a ni.

A tira ruahman sa dan chuan Villa park-ah May 18 hian inkhel tur an ni, mahse Europa League final atana inbuatsaihna hun an neih tam theih nan May 16-ah inkhel tura sawnsak an ni a, hemi chungchangah hian Aston Villa an lawm lo.

Aston Villa director of football operations Damian Vidagany chuan, "Inkhelh hun an sawn, a nihna tak sawi chuan kan lawm lo. Kan lawm loh chhan chu season hmasa khan Spurs dinhmun ang hi kan lo tawng tawh a, ngaihsak kan ni lem lo thung.

"European football hi English club tan hian dah pawimawh a ni lo emawni tih hial tur a ni ṭhin, tuna thil thleng hian nakin hunah erawh nghawng ṭha a neih ngei ka beisei thung," tiin a sawi.

Tottenham hian Europa League semifinal first leg-ah Bodo/Glimt lakah 3-1 in hma an hruai mek a, zanin dar 12:30 hian Bodo/Glimt mualah second leg an khel leh ang a, final lut turin goal chhuah tam loh a tawk.