Champion kawnghren kalsantu Fury

British boxer rothap Tyson Fury chuan WBO leh WBA world heavyweight title a kawl lai chu a damlohna avangin a kalsan.

Kum 28-a upa boxer hi hun rei tak chhung rilru lam buaina avangin a talbuai tawh a, tun hnai lawk khan a rilru hah chhawk zangkhai nan cocaine a khawih thu a lo puang tawh bawk.

November 2015-a world heavy-weight champion ni tura Wladimir Klitschko tukdawltu boxer chuan, "Tunah chuan ka hringnunah chona dang ka hmachhawn a hun leh ta. Klitschko hmaa ka dingchang ang khan hnehtu ni chunga ka rawn din chhuah leh ngei ka ring tlat a ni," tiin a title aia amah a inngaihtuah hmasak phawt a ṭul thu a sawi.

Engvangin maw?

World Boxing Organisation hruaitute chuan British boxer hi an chairman zawhna ni 10 chhunga a chhang hman lo a nih chuan a champion kawnghren an hlih sak tur thu an lo sawi tawh a, Fury hian chhanna pek aiin a champion kawnghren hlih a thlang ta zawk.

Vawi 25 inhnek a hmachhawn tawha hnehna la chang vek Fury hian November, 2015-a Wladimir Klitschko a hmachhawn hma khan an contract-ah Ukrainian boxer nen hian inhnek nawn theihna a awm. Fury-a'n hnehna a chan hnuah kum 40-a upa Klitschko-a'n inhnek nawn a duh thu a sawi a, July, 2016-a inhmachhawn leh turin ruahmanna an siam.

Manchester khaw chhuak Fury-a'n a kerek hliam vanga a inhnek theih loh thu sawiin a inhnukdawk a, October-a inhnek tura ruahmanna siam leh a ni. Mahse, Fury hian rilru lam buaina avanga harsatna tawk chhoin inhnek hmachhawn thei loin a inhnukdawk leh a, hei hi WBO chairman-in zawhna a pek chhan pawh a ni.

Fury hian Rolling Stone ma-gazine-in an kawmnaah a rilru buaina chhawk nan cocaine a hman thu a inpuang zui a, hei vang hian British Boxing Board of Control chuan nimin khan Fury hi a title a kalsan hnu nimin khan chawl rih turin an ti a, amah an koh leh phawt hnuah a boxing licence an tihtawp sak dawn leh dawn loh a hriat ang. UK Anti-Doping chuan February, 2015-a damdawi hman phal loh hman chungchanga insawifiah turin Fury hi November khian an ko bawk.

Fury thukhawchang

Gypsy King tia hminglem an vuah Fury chuan, "Ka kawnghren kalsan mai hi boxing tan pawh a ṭha zawkin ka hria a ni. Ring chhungah he kawnghren hi ka hlawh chhuak a, midang lakah ka hloh dawn a nih chuan ring chhungah ngei hloh tur ni pawhin ka hria. Mahse, tun dinhmunah chuan he kawnghren humhim tur hian ka theihnain a tlin lo a, ka ngaihhlut em em khawvel champion ka nihna kawnghren chu ka kalsan a ṭul ta a ni," a ti.

Fury promoter Hennessy Sports chuan, "Fury atan chawlh lak rih mai hi a finthlak a ni. Harsatna leh boruak sang awm miah loin a buaina tawh mek aṭang hian a talchhuah phah theih dawn a, damdawi lam mithiam te pawh a mamawh hun apiangin a ko thei ang," tiin an boxer chuan
ṭha chhuak leh tur chuan chawlh lak phawt a mamawh thu an sawi.

Eng nge an sawi?

Kum 2015-a The Ring chanchin-buin 'Fighter of the Year'-a a puan Fury putea leh a trainer ni bawk Peter Fury chuan, "Tyson hi hei aia ropui zawk hian a lo kir leh ang a, a ta chu a la let leh ang. March emaw April, 2017-ah gym-ah a rawn let leh theih ka beisei," tiin a tupa chu rei tak chawl tur a nih loh thu a sawi.

WBO middleweight champion leh Fury ṭhianṭha tak ni bawk Billy Joe Saunders chuan, "Fury hi a boxing licence chhuhsak theih a ni lo ang. Nausen chaw chhuhsak ang mai a ni dawn asin. Fury hian he harsatna patlang tur hian a licence kawl reng hi a mamawh a ni," tiin a boxing licence hloh thei dinhmuna ding mek boxer chu a chhan lawk.

IBF champion Anthony Joshua chuan, "Tyson hi a hmaa ding apiang huaisen taka hmachhawn ṭhin mi a ni a, talent ropui tak nei, boxing tana mi ṭangkai a ni. Eng ang taka harsatna nge a hmachhawn hre loa sawisel mai hi thil awlsam tak a ni," tiin a boxer pui a chhan hle.

Fury zinkawng

29 November 2015 : WBA, IBF leh WBO champion ni turin Wladimir Klitschko a hneh.

8 December 2015 : Amah chotu Vyacheslav Glazkov a hmachhawn duh loh avangin IBF title hlihsak a ni.

24 June 2016 : July-a Klitschko nen an inhmachhawn tur chu training-naa a kerek hliam vangin a inhnukdawk.

4 August 2016 : UK anti-doping chuan damdawi hman phal loh hmangah an puh.

23 September 2016 : A vawi hnih nan Klitschko lakah a inhnukdawk a, rilru lam buaina a neih thu an puang.

3 October 2016 : Twitter kaltlangin a chawlh thu a puang a, darkar thum hnu lawkah a fiamthu a nih thu a tarlang chhunzawm.

5 October 2016 : A rilru buaina chhawk zangkhai tura cocaine a khawih thu a sawi.

10 October 2016 : WBO hnena insawifiah turin hun pek a ni.

12 October 2016 : WBA leh WBO title-a kawl lai a kalsan.

13 October 2016 : BBBofC-in a boxing licence an hren sak a, amah an koh hunah an tihtawp sak dawn leh dawn loh a chiang ang.