Klitschko leh Joshua an inhnaih

British boxer ṭhangduang Anthony Joshua promoter Eddie Hearn chuan Tyson Fury-a'n WBA leh WBO kawng-hren a kalsan takah chuan a boxer leh Wladimir Klitschko te chu inhnek thei dinhmunah an din thu a sawi.

Joshua hian IBF world heavyweight kawnghren a kawl mek a, Ukrainian boxer nen hian an inhmachhawn dawn a nih chuan a kawnghren kawl lai bakah Fury-a kalsan tak WBA leh WBO kawnghren an inchuh thei dawn tihna a ni.

Eddie Hearn chuan, "Joshua leh Klitschko hian an pahniha an inhnek beiseiin gym an kal tawh ngei ang tih ka ring a, a lo thleng ngei dawn em tih chu a chiang thuai ang. He inhnek hi a thleng a nih ngat chuan kum 10 chhunga heavyweight inhnek ropui ber kan hmu dawn tihna a ni," a ti.

Kum 26-a upa Joshua hi November 26 khian Man-chester khawpuia a title venhim tum tura ngaih a ni a, mah se Klitschko nen hian an inhnek dawn a nih chuan December 10-ah an inhmachhawn a rin thu Eddie Hearn chuan a sawi nghal bawk.

Ukranian boxer Wladimir Klitschko hi kum 40-a upa a ni tawh a, vawi 68 inhnek hmachhawn tawhin vawi 64 hnehna a chang a, vawi li a tlawm. Vawi 64 hnehna a chan zingah hian vawi 53 zet chu a khingpuite a knock out a ni.

WBA, IBF, WBO (2) leh IBO champion ni tawh Klitschko hi thiamna lamah pawh a duai lo hle a, Sports Science-ah Phd neiin Dr. Steelhammer tia hminglem pek phah nan an hmang hial. A unaupa boxing chawlhsan ta Vitali Klitschko pawh kha Phd degree nei chunga world heavyweight champion ni thei hmasa ber a lo ni tawh.

Kum 2012 London Olym-pic-a Super-heavyweight gold medal a lak hnua professional boxing luhchilh ṭan Anthony Joshua hian vawi 17 inhnek a hmachhawn tawhah a khing-puite a la knockout vek a, Com-monwealth heavyweight leh British heavyweight champion a nih hnuah April, 2016 khan Charles Martin hnehin IBF heavyweight champion a ni.