Big Sam vanga inthiam lo agent

Football agent Scott McGarvey chuan England manager aṭanga bang ta Sam Allardyce banna chu thil nuihzatthlak mai a nih thu a sawi a, Big Sam-a'n a hna a chan avanga a inthiam loh thu a sawi bawk. Sunderland boss hlui Sam Allardyce hi The Daily Telegraph reporter, sumdawng hausa anga lemchang nen an in dawr a, player transfer chungchanga hma a lakna turin thamna sum £400,000 a la a ni.

Reporter nena Big Sam inhmelhriattirtu McGarvey chuan, "Pawi ka ti takzet a, Sam hian mawhphurtuah pawh min ngai ngei ang. Kha meeting-ah khan Sam kha keimah vang liau liauin a kal a, 100% in chu chu ka chiang a ni. Club tenau enkawlin match khat hnu lawkah bang ila, a la hriatthiam theih. Mahse, England meuh enkawl hnua match khat hnua ban hi chu a nuihzatthlak a ni," tiin Football Association chuan thil an ngaihtuah chiang tawk loah a ngai.

Kum 1980 chhoa football an khelh lai aṭanga a hmelhriat tawh Sam chungchang sawi chhunzawmin McGarvey chuan, "Sam hian kha thil kha ka ruahmanna emaw a ti mai thei a, mah se kei chuan khatiang thil tenawm tak hmang khan tu lakah mah thang ka kam ngai lo. Mahse, Sam hian min be duh rih lo a nih pawn ka hrethiam a, hun rei tak inkawm tawh kan nih vang erawh chuan kan indawr leh thuai ka beisei. England manager hna a chan avanga a rilru natna hi ka hrethiam em em a ni," tiin a sawi.