Real tan Kroos a rinawm

Toni Kroos chuan Real Madrid-ah kum 2022 thleng cham chhunzawm turin contract thar a ziak. Spanish news-paper AS tarlan dan chuan Germany midfielder hian chhiah pek hmain season khatah pound maktaduai 18 vel a hlawh dawn. Chumi awmzia chu Kroos hian kar khatah £346,000 a hlawh dawn tihna a ni a, German player zinga hlawh hnem ber a ni ang.

Kum 26-a upa Kroos hian Bundesliga champion Bayern Munich aṭangin kum 2014 khan pound maktaduai 24 velin Real Madrid a pan a, Spanish club tan hian match 108 a khelh tawh aṭangin goal li a khung tawh a, a ṭhiante goal khung tur vawi 31 zet a siamsak tawh thung. Zinedine Zidane a hnuaiah Real tan inkhel khaikhawmtu pawimawh leh rinrawl a ni mek.

Real Madrid chuan thuchhuah siamin, "Real Madrid leh Toni Kroos chuan contract thar ziah chungchangah inremna kan nei a, inremna ang chuan 30 June, 2022 thleng kan hnenah a cham ang," an ti.

Spain-ah season hnih hun a hman chhungin Kroos hian a club hi Champions League, Club World Cup leh UEFA Super Cup pahnih a chawi pui tawh. Kumin kumtir lam khan Manchester United chuan Kroos hi an lo hel tawh nia sawi a ni a, tun nipui transfer lai khan Manchester City manager thar Pep Guardiola pawhin a ngaihven nia sawi a ni bawk.