Zaninah MBL player lilamna

Hrangbana Memorial Mizo-ram Badminton League Season 2 player auction chu zanin dar 8:00 hian The Hotel Grand, Chanmari-ah neih tur a ni a, Zonet Zawlbuk-ah live-a pekchhuah a ni ang.

Team 5

MBL Season 1 chu nikum khan hlawhtling takin neih a lo ni tawh a, Hlimen chu champion hmasa ber niin kuminah erawh an tel dawn tawh lo.

Kuminah hian team panga an inel dawn a, chungte chu Mission Veng, Tuikual, Saron Veng, Champhai leh Edenthar te an ni. Champion lai Hlimen bakah Kulikawn an inlan theih loh avangin season hnihnaah hian a vawi khat nan Champhai leh Edenthar te a inlan dawn a ni.

Team inelna

MBL hi mimal anga inelna ni loin team inelna a ni. Team pahnih an inhmachhawn hian men's singles pahnih, men's doubles, mixed doubles leh 35+ doubles hmangin inelna neih a ni.

Auction chu le

MBL player lilamna hian kal-phung a nei a, point pawi-mawh bikte chu a hnuaia tarlan ang hi a ni.

1. Team tinin player pali
ṭheuh an lei tur a ni. An player lei turte chu men's player pahnih, women's player pakhat leh 35+ men's player pakhat an ni.

2. Auction zawhah team-te hian player mamawh an la nei a nih chuan pawn lamah an indawr ang a, an inbiakremna chu team leh player inkar a ni ang.

3. Auction-naa team pa-khatin pawisa hman theih zat chu Rs 35,000 a ni.

4. Player-te an category a zirin player pakhat lei theihna tlawm ber (base price) siam a ni. Men's player leina man tlawm ber chu Rs 4,000 a ni a, women's leh 35+ player base price chu Rs 3,000 a ni.

5. Player pakhat lei nan Rs 25,000 aia tam a hman theih loh. Team pakhat aia tam player duhzawng a inang a, an lei ngamna zat a in ang a nih chuan player te hi telephone hmanga biak an ni ang a, duh an thlang ang. An be tlang theih lo a nih chuan ṭhumvawr tur a ni.

6. Auction-naa an leina bakah hian club-te hian an duh a nih chuan hlawh an pek belh theih ang.

Auction-naa lei theih turin men's player 28, women's player pasarih leh 35+ player 17 te thlan theih turin an inziak lut a, player 51 zet thlan theih turin an awm tihna a ni.

Manajit nge Muanawma?

Lilamna hunah hian player langsar bik an dawn a, Mizoram number 1 Manajit Singh leh number 2 Lalmuanawma te chu lei theih dan sang bera an lei ngei rin a ni.

Saron Vengin nikum khan Manajit Singh an chah chhuak a, Mizoramah awm tlangin Mizoram Badminton Association hnuaiah a inziak lut tawh. NorthEast inelnaa vawi hnih lai pahnihna (2013 leh 2014) ni tawh Manajit hi Mizoram singles number 1 a ni bakah doubles ranking-ah number 2 a ni bawk. Tripura-a piang leh sei lian Manipuri tlangval hian Mizoramah coaching a kal a, Saron Vengin final hruai thlengtu player hi laklet leh tumin an chuh na khawp ang.

Mizoram ranking-ah Lal-muanawma'n Manajit tluk lo mah se MPL season khatnaah erawh a club khelhna Hlimen a champion pui. Hei chauh hi a ni lo, Muanawma hi men's doubles leh 35+ doubles-ah number 1 a ni. Kumin March thla khan 35+ men's singles-ah Muanawma hi a champion a, nikuma a khelhna an veng club Hlimen an awm tawh loh bawk avangin MBL club ten Hlimen shuttler lalut turin sum an seng huai ang.

Manajit leh Muanawma bak-ah hian Zarzokima (Ran-king number 3), M Joseph (4 ), Lalbiaksanga (5), Sa-muel Lalnunmawia (6) leh Lalduhawma (7) te chu mipa lama hming langsar an ni.

Hmeichhe lamah Lalrinzuali (1) leh F. Lalhriatpuii (2) te chu MBL club-te inchuh tur a ngaih an ni a, 35+ player lamah Lalrindika Ralte (2), Lalbiakmawia (3) leh Lal-thanliana (4) ten ngaihven an hlawh bawk ang.

MBL Season 2 hi November 1-11 chhung khian Electric Veng YMA Hall-ah buatsaih a ni ang. MBL-ah hian team panga te hi vawi khat ṭheuh an inkhel kual a, league round zawhah hian semifinal leh final a awm leh bawk ang.