Hmelma kumhlun Liverpool leh United

Thawhṭanni zanah Liverpool-in Manchester United an mikhual dawn a, he inkhela referee tura ruat chu Manchester khaw pa Anthony Taylor a ni. Taylor hi Old Trafford aṭanga mel ruk leka hlaa khawsa a ni a, Professional Game Match Officials Limited hotupa ṭhin Keith Hackett chuan hei hi a sawisel.

Keith chuan, "Taylor hi ka ringhlel lam a ni lo a, mah se a tum vang reng pawh niloin tihsual lo nei ta se engtin nge ni ang?," tiin inkhel boruak sang taka thil thleng thei tur a thlir lawk - team pahnih inhuat dan ngaihtuahin Keith hlauhthawnna hi a awm lo hran lo.

Arab sum hmanga Manchester City in lak len vanglaiin Wayne Rooney chuan, "City nena kan inhuatna hi a nasa tih phat rual a ni lo. Mahse, Liverpool nena kan inhuatna nen chuan khaikhin chi a ni lo," tiin a lo sawi tawh.

Hmanah chuan

Liverpool leh Manchester inhuat ṭanna hi khelmual pawn lamah a ni. Kum 1890 chhoah khan England-a khaw pahnih hi sumdawnna kawngah an
ṭhang nasa em em a, Manchester hi puanthan sumdawnna vanga hlawk an nih laiin Liverpool hi lawng chawlh hmun an neih vang a ni thung.

Mahse, Manchester-in a hnu rei loteah lawng chawlh hmun an sual chhuak a, sumdawng lawng tam zawkin Manchester lama innghah an thlang. Liverpool khawpui sum lakluh a tlem phah a, ṭhalai tam takin an hna an chan - khaw pahnih inhuatna chu khelmual chhungah put luh a ni a, vawiin thlengin khawvela club inhaw ber pahnih an ni ta.

Hlawhtling zawk?

Club pahnih hi English club hlawhtling ber niin an inchhal a, nomawi liantham an tih English Division 1/Premier League (18), FA Cup (7), League Cup (8), Champions League (5) leh UEFA Cup (3) ah te Liverpool champion tawhin an nomawi chawi zat belhkhawm hi 41 a ni a, United aiin an chungnung zawk.

Red Devils-in English Divi-sion 1/Premier League (20), FA Cup (12), League Cup (4) leh Champions League (2) nomawi chawi tawhin nomawi 38 an chawi tawh thung. Mahse, FIFA Club World Cup, UEFA Super Cup leh Community Shield zawng zawng chhiar tel chuan United an chungnung zawk - nomawi 64 an hun tlar tawh laiin Liverpool-in 60 bak hun tur an la nei rih lo.

Sir Alex Ferguson-a enkawlna hnuaia United an ṭhanduân lai takin Reds fan-ten, "League nomawi 18-in chawi hunah inlo kir dawn nia," tih banner nen United an tih el ṭhin a, kum 2002-a league title 15 chiah an la neih lai khan Ferguson chuan, "Ka tana chona ropui ber chu an lalṭhuthleng aṭanga Liverpool paih thlak hi a ni. In duh chuan in chhinchhiah thei ang," tiin Kop ho a chhanglet a, United-in league nomawi 20 an chawi thleng Old Trafford-ah a cham a, a thutiamah a hlawhtling.

Player transfer

Manchester United leh Liver-pool inkarah vawiin thlengin player pakua chiah transfer an la ni! Kum 1964 khan Phil Chisnall chuan United aṭangin Anfield a pan a, club pahnih inkara transfer hnuhnung ber a ni.

Kum 2007 khan Reds-in United aṭangin Gabriel Heinze lakluh an tum a, Argentine defender hian Anfield pan a duh thu ualau takin tilang mah se Sir Alex-a'n Real Madrid lamah a kaltir daih! An hmelma club hi an player duhzawng pek a tum lo.

Liverpool manager ropui Bill Shankly-a'n a hunlaiin Celtic
aṭangin Lou Macari lakluh a tum a, Scottish midfielder hian United a thlang zawk. Shankly hian a hnuah, "Ka tan pawina a awm lo, reserve team-in kan mamawh vanga lakluh tum mai ka nia," tiin a sawi!

Inhuatna chu

United legend Ryan Giggs chuan, "Liverpool hi team ṭha leh sulhnu ropui tak nei an nih avangin ka zah em em a, chutih rual chuan Reds laka hnehna chan aia nuam hi ka la hre ngai lo," a ti!

Reds player leh manager ropui Kenny Dalglish pawh khan a fanu nausen a pawm laiin media a hmachhawn a, "Ani hi United ho ai chuan rawn tlak tak a ni," tiin a lo sawi tawh bawk.

Red Devils captain hlui Gary Neville chuan, "Liverpool hi ka ngaithei lo. A mipui te hrim hrim hi ka ngainat zawng an ni lo a, Liverpool nena inkaihhnawih thil hrim hrim hi ngainat ka nei lo," tiin an hmelma kumhlun hi a haw hle.

Gerrard-a huatna

Liverpool fan-ten Steven Gerrard an ngainat em em chhan pakhat chu a thiamna piahlamah United huatna thinlung nghet tak a neih vang niin a lang. Captain Fantastic hian, "Ka naupan lai aṭang tawhin United haw tur ngawr ngawra zirtir ka ni a, club hrang hrang jersey ka inah hian hmuh tur a awm. Mahse, United player erawh ka jersey ka thlengpui ngai lo a, ka in chhungah hian Manchester United jersey-in hmun a chang tur a ni lo," a ti!

Sir Alex-a'n Gerrard chu player ṭha nia a hriat loh thu a sawi pawh khan Gerrard hian, "United tana khel tura min sawmtu kha a ni a, muttui loh phah nan hmang lo mah ila khatia a thusawi a zuk leh kha chu mak ka ti a ni," tiin Scottish manager hi a lo kap tawh.

Kum 2010-a Chelsea-in champion nomawi an chawi theih nan Steven Gerrard-a'n United nena inum Blues striker Didier Drogba-a lo pass sual 'der' tawh a, kum 2014-a Stevie G chetsual vanga Chelsea-in Liverpool nomawi beiseina an chhut chhiat pawh kha United fan-te tan lawmna a ni.