Marquez tan nomawi a hnai

Pathianni hian MotoGP Japanese Grand Prix tlan a ni dawn a, rider championship-a hmahruai mektu Marc Marquez tan world champion nih theihna kawng a inhawng dawn.

Honda rider Marquez hian tun season intlansiak vawi 14 an neih tawh aṭanga point 248 hmuin amah hnaih bertu Valentino Rossi aiin point 52 zetin a sang fal tawh. Japan-ah hian Marquez hian hnehna chang se, a hnuai chiaha mi Rossi hi 15-na chin hnuai lam a nih a, pathumna ni mek Jorge Lorenzo chu palina aia hniam china a thlen bawk chuan Spanish rider Marquez hi a champion dawn.

Mahse, thil a awmsam dawn lo; Motegi circuit-ah hian tum hmain Marquez-a'n hnehna a la chang ngai lo. Pakhatna ni tur chuan tun hma zawnga a la tih theih ngai loh a tih a ṭul dawn - fiahna hautak a hmachhawn dawn e.

Kum 23-a upa Marquez chuan, "Champion sawi a la hun lo a, a chhan chu tun season-ah intlansiak hmabak hautak tak tak pali kan la nei a, eng pawh a la thleng thei. Rossi tluka tawnhriat nei tam an awm chuang lo a, chutih laiin ka elpui pakhat zawh Lorenzo lah champion lai a ni bawk," tiin a ṭawng fimkhur hle.

Season thara Ducati bike khalh tawh tur Lorenzo chuan, "Ka ngaihdan chuan kan tan chuan pakhatna nih tum aiin pahnihna emaw podium-a lawn tum hrim hrim a pawimawh zawh," tiin Yamaha chu an ṭhat vanglai ber a nih thu a zep lo.