Nadal an dal leh tawh

Grand Slam vawi 14 cham-pion tawh Rafael Nadal chuan Shanghai Rolex Masters-a a chak loh hnuah nakkum a ṭha zawka a inkhelh leh theih a beisei thu a sawi. Nilaini khan Nadal hian Shanghai Rolex Masters-a a match hmasa ber khelin darkar khat leh minute 34 chhung lekin world number 31 Viktor Troicki lakah 6-3, 7-6 (7-3) in a tlawm.

Kum 30-a upa Nadal hi kuminah thla hnih leh a chanve chhung ngawt banrek na vangin a inkhel thei lo a, a inkhelh chhunah pawh a khel ṭha tawk lo. Tun dinhmunah world number 5 ni mah se karleha ATP ranking chhuak thar turah chuan a hnungtawlh leh ang.

Spain tlangval Nadal chuan, "Ka khingpui tan hna hautak leh harsa siamsak tur ka nih laiin chutiang chu engmah ka ti thei lo. Ka forehand a na tawk lo a, hei hi hmasawn ka ngaihna lian tak pakhat a ni. Tunah hian ka la beidawng lo a, kum tharah chuan ṭha zawka inkhel thei tura lo kir theih ka beisei," tiin a sawi.

Kuminah season khar nan ATP World Tour Finals khelh hmabak an la nei a, O2 Arena, London-ah hian world ranking-a a sang pariat chin an inel ang. Tun hnai kum 11 chhungin Nadal hi he inelnaah hian a la inlan ziah a, kuminah erawh a dinhmun a la chiang rih lo.

2008 Beijing Olympic gold medalist Nadal hi Rio Olympic-ah khan semifinal-ah a tla a, hemi hnu hian tournament pali Cincinnati, US Open, China Open leh Shanghai Masters te khel leh tawhin final a lut zo lo vek.

Inkhel dang

Inkhel dangah world number 2 Andy Murray erawhin third round lut lut turin harsatna a nei lo a, world number 24 Steve Johnson lakah 6-3, 6-2 in hnehna a chang. A zawna Olympic gold medal vawi hnih la thei Murray hian hnena chang turin darkar khat leh minute 14 bak a mamawh lo.

Grand Slam vawi thum champion tawh Stan Wawrinka chuan Britain rawlthar beiseiawm tak Kyle Edmund chu 6-3, 6-4 in a hneh ve bawk. Seeded chang phak zingah Lucas Pouille (13), David Goffin (11) leh Wimbledon finalist Milos Raonic (5) ten an khingpui an hneh ṭheuh bawk.