Dortmund tan fiahna

Zanin dar 12:00 hian Borussia Dortmund chuan Hertha Berlin an lo mikhual dawn a, an match hnuhnung pahniha chak ni hmel hmu lo Thomas Tuchel-a naute tan fiahna a ni ang.

Bundesliga match ruk an khelh aṭanga goal nga khung tawh striker Pierre-Emerick Aubameyang a dam ṭha a, innghahna tham a tling. Dortmund-in thu lawmawm dang an neih chu Marco Reus-a'n training a zawm leh ta hi a ni.

Germany international Reus hi tun season-ah a la inlan lo a, Thawhlehni khan a ṭhiante zingah harsatna nei loa training a neih leh tawh avangin zaninah hian a hmel kan hmu a nih pawhin a mak lo ang.

Dortmund hi season bulṭan nia an match hmasa berah Leipzig lakah 1-0 in chak lo mah se hemi hnuah an insiam ṭha rang hle a, inelna hrang hrangah a zawna vawi li hnehna changin goal 20 teh meuh an khung a, goal hnih chiah an chhuah nghe nghe.

Mahse, Champions League-ah Real Madrid nen 2-2 in an inhnehtawk a, league-ah Bayer Leverkusen 2-0 in an hneh lo zui bawk. An elpui Bayern Munich nen point liin an inthlau mek a, Carlo Ancelotti nauten point an hloh khat em avangin Dortmund tan point hloh loh a fuh ang.