South Africa lakah Australia mualpho

David Warner-a run 173 zet siamin Australia mualphona a hliah khuh zo lo, run 32-in South Africa an chak tho. Nilaini zan khan Newlands-ah ODI vawi ngana leh tawpna ber khelh a ni a, South Africa-in bat hmasain run 327 zet an vaw chhuak. Mikhual Australia tan target a sang lutuk hret a, 48.2 over-ah run 296 chiah an la vaw chhuak tihin vawm hlum vek an ni.

South Africa-in series 5-0 in la a, tun ṭum hi cricket thiam ram Australia-in 'whitewash' an tawnna hmasa ber a ni. Kum 2012 khan Natwest Series-ah England-in Australia hi 4-0 in an hneh tawh a, hemi ṭum hian match khat hi ruahsur vanga khelh a nih loh avangin 'whitewash' ah chhiar a ni lo.

Australian batsman Warner hian run 173 zet a siam avangin South Africa laka run siam tam lamah tluk loh pakhat chiah a nei a, Indian legend Sachin Tendulkar chuan kum 2010 khan Gwalior-ah South Africa lakah run 200 zet siamin a thi lo bawk.

Steve Smith-a captain-na hnuaiah Australia-in result ṭha an nei lo a, match 11-ah vawi kua an chak lo. November 3 hian test series vawi thum zinga hmasa ber khel turin Perth-ah Australia leh South Africa an inhmachhawn ang.