Highlanders an sang zel

NorthEast United-in season bul an ṭan ṭhat an chhunzawm zel a, Nilaini zan khan Indian Super League match li an khelh tawha an vawi thum chakna ni turin Pune City chu khualmualah 1-0 in an hneh. Highlanders goal neihchhun hi Emiliano Alfaro khung a ni a, Uruguay tan pawha lo inlan tawh striker hian league match li a khelhah goal thum a khungna chiah a ni.

Highlanders coach Nelo Vinga-da chuan, "Ka player-te khelh dan-ah ka lawm a, hnehna chan hi an phu a ni. Vawiinah khan champion team ang maiin an khel a, he team ka enkawl thei hi ka inchhuang tawlh tawlh a ni. Min ṭawiawmtu kan fan-te pawh ka theihnghilh thei lo a, anmahni vangin tun dinhmun hi kan thleng thei a ni," tiin a lawm hle.

Saudi Arabia boss hlui chuan sawi chhunzawmin, "Zaninah hnehna chang mah ila chawl nghal mai tur erawh kan ni lo. Kan hma lawkah Delhi Dynamos kan lenchilh dawn a, vawiina kan chak hi theihnghilha theihtawp kan chhuah chhunzawm nghal a ngai dawn a ni," tiin ISL nomawi chawi tur chuan an hma bakah kawng thui tak a la awm thu a sawi.

Pune City tan NorthEast United player hlui Zodingliana Tochhawng chuan inkhel bul a ṭan a, Armed Veng tlangval tan Nilaini zan inkhel hi tun season ISL-a a match hmasa ber a ni.