Higuain tluk tumtu Immobile
Lazio hmatawng Ciro Immobile chuan Serie A season khat chhunga goal khung hnem ber Gonzalo Higuain-a record nih rual theih a beisei a, hmabak erawh a la ngah angreng hle.
Italian football inelna sang berah hian 2015-16 season khan khatih laia Napoli striker Higuain chuan goal 36 a khung, Argentine striker record ṭha tak hi khum thei an la awm lo.
Tun season kal laiah Immobile hian goal 27 a khung tawh a, match khelh hmabak 12 an la nei. Record ding lai a phak lohna hi goal kua a ni mek a, tluk mai bakah khum theihna kawng a inhawng mek.
Kum 30 mi Immobile chuan, "Record hi ka tluk thei ang em tih ka hre lo, chutihrualin beiseina chu a awm. Tuna ka goal khung zat khung tur pawh hian ka thawkrim em em a ni.
"Mitin hian thil tum leh beisei kan nei thei vek a, a ṭhen a hlawhtlin laiin hlawhtling zo ta lo pawh a awm ṭhin. Kei chuan theihtawp ka chhuah chhunzawm dawn tih bak hi chiang taka sawi theih ka nei rih lo," a ti.
Italy international Immobile hian Lazio chu 2000 hnua a vawi khat nan Serie A nomawi lak pui a beisei mek. Champion leh hmahruaitu ni mek Juventus an phak lohna chu point khat chauh a ni, tunah erawh hri leng vangin an inkhel chhunzawm thei rih lo.
Immobile chuan sawi zawmin, "Kan thil tum chu a la pangngai reng, match khelh hmabak kan la neih 12 hi a ṭha thei ang bera khelh a ni. Tunah chawl rih mah ila engtikah emaw chuan khelmualah kan la lut leh dawn, chumi hun atan chuan taksa leh rilru inbuatsaih a ngai," a ti.