City player ten chawimawi an phu - Bernardo Silva
Bernardo Silva chuan Manchester City tana a khelhpui player-te chuan mimal chawimawina dawn an phu hlein a hriat thu a sawi a, a hma hun an zawhnaah engtik niah emaw chuan Benfica lama kir leh a duh thu a sawi.
Tun hnai Premier League season pahnihah Pep Guardiola kaihhruai Man City an champion. Liverpool forward Mohamed Salah leh defender Virgil van Dijk te chu PFA Player of the Year award hlan an ni thung.
Season hnuhnung ber bikah Van Dijk chu UEFA Best Player of the Year atan thlan a ni bawk a, manager Jurgen Klopp kaihhruai Reds hian Champions League nomawi an chawi avangin he award hi chu a awm lo hran lo.
Portugal international Bernardo chuan Man City chhuanvawr - Kevin De Bruyne, Fernandinho leh Raheem Sterling te chu mimal chawimawina dawn an phu hlea a hriat thu sawiin, "Media leh thil dang hian khelmuala thil thleng hi a ti danglam ve thei.
"Ka hmuh dan chuan tuna an dinhmun aia sanga chawimawi hi chu an phu. Season hnih liam ta kha han thlir ila, league nomawi kan chawi a, kan elpui zinga mi Liverpool ai khan pioint 30 deuhthawin kan sang zawk.
"Hlawhtlinna kan chan ṭum pawh khan player pawimawh Kevin De Bruyne chu chawimawina pek a ni lo a, Mo Salah hnenah hlan a ni. Salah khan goal a khung hnem a phuin ka zah hle, chutihrualin kan team zinga mi pawhin an phu," a ti.
AS Monaco midfielder hlui chuan a hma hun zawhna chhangin, "Ka hun tawn lai hi nuam ka tiin ka hlim tawk, tunah chuan kan ram lama inkhel tura kir chakna ka nei rih lo. Mahse engtik niah emaw chuan Benfica tan ka la khel leh ang tih hi ka ngaihtuah ṭhin.
"Benfica ṭantu ka ni a, ka pa nen an inkhel lai kan en ṭhin. An team tana khelh ve kha ka chak thei em em a, kum 19 mi ka nih khan second team tan ka khel. A hnu lamah erawh ka hma hun a danglam ta thung, ka thinlungah erawh a cham reng ṭhin," a ti.