French Grand Prix hun sawn a ngai
Formula 1 French Grand Prix chu a neih hun tura ruahmanah neih theih a ni dawn lo, inelna neih hun tur hi tih chian la ni lo mah se Covid-19 vangin an sawn ngei chu a ngai dawn.
Thawhṭanni khan French president Emmanuel Macron chuan TV kaltlangin thu a sawi a, "July thla laihawl thleng chu vantlang mipui punkhawmna lampang chi tih phal a ni lo," a ti.
French GP hi June 28 hian Marseille bula Circuit Paul Ricard-ah neih tur a ni, an ram sorkar thu chhuak vangin a hun hi sawn ngei a ngai ta a ni. Hri leng vang hian March thlatira ṭan tur car intlansiakna sang ber hi an la tlan ṭan thei lo.
Macron-a hian an rama lockdown kalpui lai chu May 11 thleng kaltlangpui tur a nih thu a sawi a, hetihlai hian zirna in te chu hawn a ni tawh ang. Zu dawr, restaurant leh cinema hall-te chu khar a la ni zel thung ang.
Kar hmasa khan F1 managing director Ross Brawn chuan world championship chu neih theih ngei an beisei thu a lo sawi tawh a, kumina an zo hman lo a nih pawhin nakkum January thla thleng an hman a ngai hial mai thei.
F1 team-te hian an sumdawnna leh thil siam chhuahna hmunte chu an khar lailawk mek a, season danga August thlaa nipui chawlh an hman ṭhin pawh an hmang dawn lo tih a chiang tawh bawk.