Jerry chet ṭhat zanah Chennaiyin an chak

Ningani zan Indian Super League inkhelah Mizo rawlthar Jerry Lalrinzuala chu Emerging Player of the Match atan thlan a ni a, Bethlehem rawlthar khelhna Chennaiyin FC hian an mikhual FC Goa chu 2-0 in an hneh.

Mipui 18,000 pung-khawm hmaah Chennai club tan Hans Mulder leh Mehrajuddin Wadoo te chuan first half minute 30 chhungin goal khat ve ve an khung a, match hnih chhung a zawna goal a khung loh hnuah Jeje Lalpekhlua chu bench lamah hun hman tluan tir a ni.

French club FC Metz lama training lo nei tawh Jerry Lalrinzuala chuan, "Foreigner bula khelh chu a nuam ka ti takzet, ka game hmasa pahnih lamah beisei ka phak loh avangin coach in min khelh nawn tir pawh ka beisei tawh lo a, mah se zanin kha in en chhin nan chance dang min pe leh a, ka chhawr ṭangkai ta a ni," tiin Emerging player of the match a thlan a nih chungchang a sawi.

Jerry chuan senior player Jeje te avangin Chennaiyin-ah chuan a tlangnel nghal thu sawiin, "Jeje te an awm sa avangin ka tan thil a awlsam a, nasa takin min pui a ni. Coach Marco Materazzi pawhin min duhsak a, hmasawn ka ngaihna lai te min hrilh reng a, nitin hian zir tur thar a awm reng a ni. Kan match hmabak zelah pawh hmun pawimawh chan zel ka beisei," tiin World Cup nomawi lo chawi tawh Italian coach chuan a rintawk thu a sawi.

Chennaiyin hian AIFF Elite Academy nena thawk dunin Indian player panga chu French club FC Metz-ah training turin an tir a, heng zingah hian Jerry pawh hi a tel. ISL khelh a nih dawnah Chennai club hian Jerry an ko a, pre-season training an neih naah an hruai. India Under 16 leh 17 captain hlui hian Italy lama pre-season neihnaah hotute mit a tlung a, ISL season 3 squad-ah an telh.

Bethlehem left back Jerry hian ISL ṭan hmain hmun a chan beiseiawm lo mah se match hmasa pahnihah substitute nichungin a inlan a, match thumnaah phei chuan inkhel bul ṭanin Emerging Player of the Match-ah hial thlan a ni ta.

Mimal Lawmman

Emerging Player of the Match Jerry Lalrinzuala, Chennaiyin FC

Hero of the Match Hans Mulder, Chennaiyin FC

Zanin Inkhel Tur

Delhi Dynamos 07:00 PM NorthEast United

October 16, Pathianni Zan

Atletico de Kolkata 07:00 PM FC Goa