Mesut Ozil a dam - Wenger

Arsene Wenger chuan zanin dar 7:30-a Swansea City an lo mikhual hunah Mesut Ozil a inlan theih ngei a beisei thu a sawi.

Nilainia Germany-in 2-0 a Northern Ire-land an hneh ṭumin Ozil hi hliam vangin first half-ah lakchhuah a ngai a, inkhelh zawh hnuah Gunners midfielder hian hliam na a neih loh thu leh kartawp Premier League match a khelh theih a beisei thu a lo sawi chhuak tawh.

Wenger chuan, "Ozil hian harsatna nei loa a inkhelh theih thu min hrilh tawh a, training-naa a chetdan a pawimawh ang. Ram tan khan minute 45 chiah a khelh a vangin a hahdam zawk pawh a ni thei a, chuvangin chhawr theih tura a awm ngei ka beisei," a ti. Hetih lai hian Aaron Ramsey hliam a la dam fel lo a, striker Olivier Giroud pawh a din-hmun a la chiang lo bawk.

Wenger chuan Barcelona nena an sawi zawm defender Hector Bellerin chungchang sawiin, "Tun hnai kum thum chhunga a hma-sawn chak dan hian min ti lawm hle a, tunah chuan khawvela a
ṭha berte zinga mi a ni tawh. Ka ngaihdan chuan kan bul ṭanna hmuna kir leh kher hi a ṭul lo, chuvangin a ni pawh hian Emirates Stadium-ah hun rei zawk cham tura contract a ziah ngei ka beisei," a ti.

Arsenal hian an mikhual tur Swansea lakah record an nei ṭha bik lo a, Emirates Sta-dium-a an intawn hnu-hnung paliah vawi thum Welsh club hi vawi thum an chak. Season liam taa Gunners-in nomawi an chan chhah pawh kha March thlaa Swans an hneh loh vangah a ngaih theih a, manager thar Bob Bradley hnuaia khel tur Welsh club hi London club tan zuam chi a ni lo.