Team hmuhnawm Spurs inlan zan

Pep Guardiola hnuaia insiamṭha Manchester City-in tun season inelna hrang hrangah team pakhat lakah chiah tlawm hmel an la hmu - an ngam loh hi Mauricio Pochettino enkawl Tottenham Hotspur an ni. Champion beisei ngam Spurs hian zanin dar 7:30-ah West Brom an lenchilh ang.

City an hnehna kawngah Spurs player-te an thawkrim takzet a, City players hlawh hnem rualte che hleithei loin an dangchat. Minute 90 chhungin km 118.8 zet an tlan! Hetihrual hian Pochettino-a game plan dang chat tur chuan West Brom tluk an awm kher lo mai thei - an home match hnuhnung bera West Ham 4-2 a an hneh ṭum khan Baggies player-te tlan zat belhkhawm chu km 120.5 a ni.

Argentine manager Po-chettino chuan, "Inter-national break vangin harsatna kan nei a, ni 23 chhung lekin ka player ten match sarih an khel a, an chau a ni. Baggies lakah poin thum kan duh a, kan hma lawkah Bayer Leverkusen, Bournemouth leh Liverpool ten min nghah bawk si avangin fing taka player ka remkhawm a ṭul dawn," tiin a sawi a, player chau a sawi zingah Son Heung-min a tel. South Korean striker hian league match li a khelhah goal li a khung tawh a, South Korea tan pawh goal khung a ṭhulh chuang lo - a inlan loh chuan Baggies tlarhnung an thaw huai ang.