Spurs-in Kane hralh an tum lo
Tottenham Hotspur chuan sum harsatna avanga an striker chhuanvawr Harry Kane hralh tum anga sawi thawm awm chu an pha a, English striker hi an hralh loh tur thu an sawi - a bik takin English football-a an elpuite lakah hralh an tum lo lehzual.
Kum 26 mi Kane hian June 2018 khan Spurs tan kum ruk dang khelh chhunzawm turin contract thar a ziak a, mahse thla hmasa lawk khan England captain hian Spurs-a cham reng tur a nih kher loh thu a sawi.
Kane chuan, "Chona hmachhawn duh mi player ka ni a, hmasawn zela player ṭha zawk nih ka duh - a chung ber zinga mi nih ka duh a ni. Spurs-ah hian kumkhuain ka cham dawn tihna a ni lo a, ka cham reng lo ang tih pawh ka sawi thei chuang lo.
"Spurs hi ka hmangaih reng dawn. Mahse, he club hian kawng dik a zawh a, hmasawn zawngin a pen nia ka hriat loh chuan he hmuna cham reng tur ka ni lo," a ti a, English striker hian nomawi liantham chawi ngei a duh tih a chiang.
Tun hnaiah Covid-19 hri leng vangin club tam tak an talbuai a, chung zingah chuan Spurs an tel. Kane-a'n thla hmasa lawkah chhuah a hnial loh thu a lo sawi tawh bawk si a, hei hi remchangah lain khawthlang media-te chuan Spurs hian Kane hralh an pawi ti lo, niin an sawi.
Mahse, Spurs hian Kane hi an hralh dawn a nih chuan pound maktaduai 200 vela hralh theih an inbeisei - khawvela footballer manto ber Neymar chuan 2017 khan Barcelona aṭangin Paris St-Germain chu pound maktaduai 200-in a pan a, Neymar-a man zat hi a tluk dawn tihna a ni.
Chutihruala hriat tel tur chu coronavirus hri leng hian Europe-a club lian dangte pawh a nghawng vek a, tun hri leng hian nipui transfer bazar thlengin club sum sen a ti tlem tura ngaih a ni - pound maktaduai 200-a Kane lei thei hi an awm a rinawm lem lo.
Hun rei tak aṭang tawha Kane duhtu langsar chu Manchester United an ni a, European club hausa ber pawl pawh hian Covid-19 in na taka sum dinhmun a nghawng laia heti zat sum sen hi an duh bik kher lo ang.
Khawthlag media ṭhenkhat tarlan dan chuan Spurs chairman Daniel Levy chuan Kane-a'n thla hmasaa June-ah chuan league tihtawp mai ṭha a tih thu a sawi avangin a striker chungah hian a lungawi lo niin an sawi bawk.
Kane hian, "Premier League chuan season khelh zawh theih hram dan a ngaihtuah dawn. Mahse, thil reng reng hian tawp chin a nei tur a ni a, June thla tawpah kan inkhel hman lo a nih chuan league hi tihtawp mai a ṭha," tiin a sawi.
England tan vawi 45 inlana goal 32 khung thei striker sawi ang hian season hi tihtawp ni ta se broadcasting deal aṭanga an sum hmuhsa tam tak chu television company lamin an lak let a rinawm a, hei hi a tuartu tur chu club an ni - Spurs tan thu hriat nuam a ni lo ang.
Hetihrual hian Daily Mail-in a tarlan dan chaun Sky chuan league hi khelh zawh theih ni lo ta pawh ni se an sum pek tawh sa aṭangin pound maktaduai 371 chu lak let tumna an nei lo.
Hriat tel tur chu Spurs hian an stadium sak nan pound maktaduai 637 vel loan an la nia sawi a ni a, transfer fee atan pound maktaduai 83 vel leiba an nei bawk - Kane hi hralh an lo duh ngei a nih pawhin a makin a rinawm lo a, mahse sawi tawh angin club zawng zawng an talbuai avangin a lei thei club erawh zawn fe a ngai ang.
Kane hian Spurs tan inelna hrang hrangah match 278 khelhsak tawhin goal 181 a khungsak tawh a, 2014-15 season aṭang khan season khata goal 20 aia khung tlem a la nei lo.
Tun season-ah match 25 khel tawhin goal 17 a khung a, hliam vanga inlan loh a nei nual - season tih tawp a nih chuan 2014-15 season hnua a vawi khat nan goal 20 khung tling loin season a khar dawn tihna a ni.