Zanin 7:30 : Guardiola Vs Koeman

May 20, 1992 khan Barcelona tan Wembley Stadium-ah Ronald Koeman chuan extra time minute 112-naah vawi tam a hming a lo chher tawh ṭhin dan angin freekick aṭangin kawh pawtin a pet goal a, Catalan club-in European Cup (Champions League) nomawi chawi turin Italian club Sampdoria 1-0 in an hneh. Dutch player leh manager ropui Johan Cruyff-a kaihhruai team-ah Koeman chu defence laimu (sweeper) a ni a, hetih hunlai hian Spanish midfielder pan thlir thler Pep Guardiola chu kum 20 leka upa ni mah se jersey no. 10 hain khelmual chhungah a kawlhrawng tawh a, 'Cruyff-a Dream Team' tifamkimtu zinga mi a ni.

Tunah chuan 90's chhoa player ṭha zinga sawi tel
ṭhin pahnih kha coach ṭha bik huangah chhiar tel an ni tawh a, zanin dar 7:30 hian Etihad Stadium-ah Guardiola chuan khelmuala amah kaihruai
ṭhintu Koeman leh a hote Everton a mikhual ang.

Manchester City hi Premier League hmahruaitu an ni a, Everton hi panganaah awmin vawi khat chiah la chak lo an nih avangin inkhel hmuhnawm beisei ngawt loh chu tih theih dang a awm lo.

Hmanah chuan

Johan Cryuff-a'n Bar-celona-a enkawl lai khan Dutch manager ṭhenawmah Koeman hi a awm ṭhin a. Ṭum khat chu Cryuff hian a hnampui pa Koeman hi mamawh a neih avangin a hmu a, hemi ṭum hian Dutch manager chuan, "Training camp leh hotel atan roommate thar neih a duh em?" tih a zawt. Tawnhriat nei ṭha sweeper Koeman chuan, "Cryuff khan academy-ah Pep-a chevel hi a hmu tawh a, reserve-a hma a sawn chhoh dan a hmu bawk. First team-a khel tlakah a ngai a, ka bulah 'Dutch khelh dan hmang' zir turin a duh. Kei chuan, 'Theihna a nei a, a fel phawt chuan ka duh,' tiin ka chhang," tiin hetih hunlaia thil thlen dan a sawi.

Cryuff leh Koeman-a hnuaiah Pep chu a intat hriam chho a, a inkhelh hun laiin Guardiola hian European Cup nomawi vawi khat chauh chawi mah se inkhel kalhmang hre thiam bik a nihzia a khel lai hmu hmante chuan an hria ang. Pep hi player na-ran chunglam ni mah se coach a nih hnua a ropuinain player anga a sulhnu ṭha a hliahkhuh a. A inkhelh hunlaiin Cryuff chu sawi loh Koeman pawh a elpha loa ngai an awm a nih pawhin a mak lo a; amaherawhchu coach a nih hnuah erawh Pep chu 'The New Cryuff', 'The New Busby', 'The New Wenger" emaw 'The New Fer-guson' tih a ngai lo - Pep Guar-diola tih hian engkim a chiang.

Engtin zel?

Manchester City-in inkhel hnuhnung pahniha Celtic leh Tottenham an hmachhawn
ṭumah goal nga an chhuah a, hei vang hian tlar hnung rem phui ṭhat a pawimawh.

Tla rhma lamah Kevin De Bryune inhliam mah se City tana thu lawmawm chu Sergio Aguero an nei - he striker hian Argentina tan penalty hlahin ram tan che ṭha tawk lo mah se club tan chuan a vul reng.

Everton striker Romelu Lukaku-a'n league match rukah goal nga a khung thei a, Toffees-in City hi a zawna chak lohtir an tum a nih chuan Belgian striker palian hi a pawimawh ang.