Stamford Bridge-ah Premier League champion

Vawiin tlai dar 5:00-ah Chelsea-in Premier League champion Lei-cester City an mikhual dawn. Stamford Bridge-a Foxes an len hnuhnun ber May 15 khan Blues hian Premier League-a Leicester champion puitu an manager hlui Claudio Ranieri chu guard of honour an pe a, vawiin tlaiah erawh season ṭan tir a la ni a, team pahnihin beisei tur tam tak an la neih lai a nih avangin Italian manager hi zahna nena lo mikhual ai chuan lunghnur taka hawtir an duh zawk ang.

Ranieri chuan, "Ni 22 chhungin match sarih zet kan khel a, player ka siksawi nual mai thei. Chelsea ka zin hnuhnun ber ṭum khan guard of honour nen duhsak takin min lo mikhual a, ka lawm takzet. Vawiinah erawh hnehna chan ngei duhin kan kal dawn a, ṭhat in lawm hun a ni lo," tiin Stamford Bridge-a chak an tum tur thu a sawi - kum 64 a upa manager tan Premier League-a Chelsea a hmachhawn vawi thumna tur a ni dawn a, manager pathum Jose Mourinho, Guus Hidddink leh Antonio Conte a hmachhawn dawn tihna a ni! Ranieri hian Fiorentina manager a nih laiin hetihlaia Juventus player Conte hi lakluh tumin a lo dawr tawh!

Tun season League Cup-ah Ra-nieri-a'n Conte a mikhual tawh a, goal hnih an khung hmasak zet hnuah 4-2 in Foxes an tlawm. Conte-a'n Blues-ah bul ṭan ṭha viau mah se league-a an match hnuhnung paliah vawi khat chiah an chak thei. Kum 47-a upa manager hian Chelsea thlak danglam hlawk turin hun a mamawh thu a sawi a, Blues neitu Roman Abramovich hi pa dawhthei tak a ni lo tih erawh khawvel hriat a ni.

Kerek hliam vanga hun eng-emaw chen a chawlh hnuah Blues cap-tain John Terry chu Foxes mikhual thei tura beisei a ni a, hliam vanga Nigeria kohna chhang thei lo Victor Moses dinhmun erawh a la chiang lo. Leicester-in hliam tenau vanga England squad zawm thei lo midfielder Danny Drinkwater an chhawr theih tawh an beisei a, Nampalys Mendy erawh kerek hliam vangin a la inlan thei lo ang.