Kan nghak chhuak ta LPS Pro Fight - Title Fight
Zothan Autoworks LPS Pro Fight 2016 Title Fight chu zanin dar 8:00 hian
R. Dengṭhuama Indoor Stadium, Mualpuiah neih a ni dawn. Category ngaihven hlawh bik chu awm bawk mah se bout hmasa ber light flyweight aṭanga lightheavy thlengin en manhla tak a ni vek ang.
Light fly- Siaha tlangval
Light flyweight-ah NT Lalbiak-kima'n ro a rel a, kumin hian a lung-thu kim nan a kawnghren kawl lai humhim ngei a tum. Siaha tlangval Biakkima hian kum 2014 khan Laldinmawia hnehin a champion a, nikum khan Lalrinsanga Tlau hneh lehin lightfly-a vawi hnih champion hmasa ber leh champion zawn awm chhun a ni.
Siaha tlangval chotu Lalthanga'n Title Fight thleng turin final-ah Tuipui tlangval Laldingliana chu split decision-in an hneh a, Bungkawn Vengthar tlangval hian boxer paruk zet a hneh tawh avangin eng result pawh thleng se kumin inelna bikah chuan chak tam ber a ni tawh tho tho. Assam Regiment boxer Lalthanga hian kum 2010 khan semifinal a thleng tawh a, kawnghren nena an inkarah bout khat chiah a awm ta.
Bantam - Intluk tawk!
Kawnghren kawltu H.C. Lal-ramfela hian tualchhung boxing-ah hming la chher lo mah se nikum khan Lalnunhlua lak aṭangin kawnghren a chhuhsak a, bantamweight-ah champion thei palina a ni.
Chawngtlai tlangval Lalramfela dinhmun hi a derthawngah a ngaih theih a, zanin hian Zonuntluanga (Tetea) lakah fiahna a hmachhawn ang. Dinthar tlangval Tetea hian Title Fight thleng turin talent nei
ṭha James Laltlanmawia chu split decision-in a hneh.
Tetea pawh hian kum 2014-a last 16 a thleng tih bak chu Pro Fight-ah chhuan tur a nei lo a, chutihrualin Dinthar tlangvalin kawnghren kawl turin a hnek ranna a lantir nawn leh a ṭul dawn a ni.
Middle - Champion thar?
Middleweight-ah champion lai Johnkenty H.C. Vanhlimpuia a awm loh avangin he weight-ah hian boxer ṭha an tam tawk loah ngaih a ni a, champion thar an awm dawn tih a chiang. Chutihrualin zanina chak tura rinkai zawk Zarzoliana hi kum 2010 leh 2011 khan a lo champion tawh a, C. Lalduhawma hi a hneh thei a nih chuan vawi thum champion hmasa ber a ni ang.
Leitan tlangval C. Lalduh-awma hian Pro Fight hmasa lamah weight hniam zawkah a khel ṭhin a, middleweight-a inlan hmasak berah Title Fight hmachhawn thei nghalin Sawleng tlangval hi hneh ngei a tum ang.
Lightheavy - Record thar
Johnkenty H.C. Van-hlimpuia'n Pro Fight-ah weight pahniha champion thei hmasa ber nih a tum a, semifinal-a Chawnpui tlangval Joseph Lal-rin-tluanga a hneh danah sawisel kai deuh mah se final-ah erawh Hnahthial tlangval H. Lalrinhlua chu round hnihna lekah a knockout.
Champion lai Saron Veng tlangval P.C. Lalmuankima'n split decision-in nikum final-ah Lalrinhlua hi a hneh tawh a, kumin final-a Johnkenty khelh dan thlirin kawnghren humhim kawnga Muankima hmabak a harsa dawn tih a chiang.
TITLE FIGHT - BOUT 7
Champion Challenger
LIGHTFLY
NT Lalbiakkima (Siaha) Vs Lalthanga (Bungkawng Vengthar)
BANTAM
H.C. Lalramfela (Chawngtlai) Vs Zonuntluanga (Dinthar)
FLY - Hmeichhia*
Vanlalduati (Khawbung) Vs R. Lalruatfeli (Edenthar)
LIGHT - Hmeichhia*
Lalhriatpui Jahau (Champhai Vengthar) Vs Lalbuatsaihi (Tuithiang)
LIGHT
Lalmuanpuia (Khatla) Vs Anthony Lalduhawma (Govt. Complex)
MIDDLE**
Zarzoliana (Sawleng) Vs C. Lalduhawma (Leitan)
LIGHTHEAVY
P.C. Lalmuankima (Saron Veng) Vs Johnkenty H.C. Vanhlimpuia (Tuipui)
* Hmeichhe inelna hi kuminah a vawi khat nan neih a ni a, champion an la awm lo.
** Middleweight champion lai Johnkenty-a'n a kawnghren kalsan a Lightweight inelnaa a tel avangin champion thar an awm dawn.