Mitdel meng fiah Abdellatif Baka
Midangte aia kan chak lohna lai leh harsatnate inhnehtir ngai lotu chu an ding chhuak ṭhin tih tifiahtu chu Abdellatif Baka a ni. Baka hi a mit (eye) in khua hmu fiah lo mah se infiamna huangah a inkiltawih phah lo; huaisen taka hringnun hmachhawntu Algerian middle-distance runner hi Rio Paralympic a zawh meuh chuan khawvelin a hmu fiah chiang hle!
Piangphunga rualban lote tana infiamna hunpui lian leh ropui ber Brazil khawpui pakhat Rio de Janeiro-a neih takah khan Baka chuan mipa khawhmuh fiah lote inelna 1500m (T13 class)-ah ropui takin hnehna a chang. Maracana Stadium-a intlansiakah Baka hian gold medal dawng tur hian minute thum leh second 48.29 chiah hun a hmang. Rio Olympic mipa 1500m intlansiaka pakhatna Matthew Centrowitz Jr. khan minute thum leh second 50 hun a hmang thung - fuke kim, piangphunga dik lohna nei lo aiin Baka hi a chungnung zawk fe tihna a ni.
Hei mai hi a la ni lo - Rio Olympic-ah khan mipa 1500m intlansiaka pahnihna Taoufik Makhloufi (3:50.11) leh pathumna Nick Willis (3:50.24) te kha Paralympic-a pahnihna Ethiopian athlete Tamiru Demisse (3:48.49) leh pathumna Kenyan tlan chak Henry Kirwa (3:49.59) te pawhin an khum hneh hle a, rualban lo zinga pathumna ai pawhin Rio Olympic-a pakhatna United States tlangval khan tlan chen inangah hun a hmang rei zawk tihna a nih chu!
Baka chuan "Gold medal lak kha thil awlsam a ni lo, pakhatna ni tur khan kum hnih chhung chu chawl miah loin rim takin ka bei a ni, a awlsam lo," tiin hlawhtling tur chuan rim taka beih a ngaih thu a sawi. Mahni veng chhunga a ṭha leh thiam ber nih pawh a harsat teh luh nen khawvela a
ṭha ber ni tur chuan a awlsam lo ang tih chu a chiang - thawhrim vang a ni.
Baka coach Abderahmane Brahmi chuan, "He thil thleng hi midang tan pawha hriatreng tawh tur a ni a, dinhmun ṭhat loh vanga lungngaia indawm kun mai tur a nih loh zia a ti lang chiang hle. Baka hian theihna sang tak a nei tih chu hre mah ila world record a siam kher chu kan beisei ngam lo zawk," tiin an duhthusam aia ṭhaa inelna an hmachhawn thu a sawi. Brahmi hian an tum ber chu 2020 Tokyo Paralympics-ah tuna aia ropui zawka inlan an tum thu a sawi tel bawk.
Tu nge Baka chu?
El Eulma, Algeria-ah May 7, 1994 khan a lo piang a, a piantirh aṭangin a unau Fouad nen an mit a ṭha lo nghal. An khua Setif hi Algerian capital Alger aṭanga 300km a hla a awm a ni a, mipui 214,842 vel an awm. Khaw eng hmu thei lo mah se Baka te unau hian kum kua an nih aṭangin infiamna khawvela an luhchilh ta tho a, an taksa rualban lohna chu an inhnehtir duh lo.
Kum 2012 London Paralympic-ah khan Baka hi a lo inlan tawh bawk a, khami ṭum khan 800m intlansiakah gold medal a lo la tawh. A unaupa Fouad erawh kumin hi Paralympic-a a inlan ṭum khatna a ni thung - infiamna khawmpui liana a inlanna hmasa berah Fouad pawh a che chhe lo hle - 1500m (T13 class) hi 3:49.84 chhunga thlengin palina a ni.
Baka hian IPC World Championship lamah pawh hnuhma a nei ṭha a, 2013 Lyon (800m T13) leh 2013 Lyon (1500m T13)-ah te khan gold lo dawng tawhin 2015 Doha (800m T12) leh 2015 Doha (1500m T12)-ah te khan silver medal a lo la tawh bawk - tunah kum 22 chauh upa a la nih avangin hnuhma lian leh hrawl zawk a hnutchhiah chho zel a nih pawhin a mak lo ang.