La Liga Zaninah nomawi inchuh club inlan kim dawn
Spanish La Liga-ah cham-pion beisei ngam team pathum chauh an awma ngaih a ni a, Spanish football thununtu pathum Barcelona, Atletico Madrid leh Real Madrid te chu zanin league match-ah an inlan kim dawn.
An league match hnuhnung bera Celta Vigo laka 4-3 a mual-pho Barcelona hian Deportivo La Coruna an mikhual dawn a, zanin dar 7:45-ah an inkhel ang. La Liga hmahruaitu ni mek Atletico Madrid hian zan dar 10:00-ah Granada an mikhual ang a, Real Madrid hian zan dar 12:15-ah Real Betis an lenchilh thung ang.
MSN an lo kir
Lionel Messi-a'n kar thum chhung hliam vanga Barcelona kawr a hak loh hnuah training a zawm leh tawh a; Luis Suarez, Marc-Andre ter Stegen leh Javier Mascherano te chuan international break-a ram tan an fehchhuah hnuah training an zawm leh tawh bawk.
Messi ber a dam tak avangin Messi, Suarez leh Neymar kan hmu leh thei dawn tihna a ni. Football ngainatute tana mit tlaina hi Deportivo tlarhnung tan erawh mangchhia an ni thei.
Barcelona tana hriat nuam lo tur erawh defender Jordi Alba, midfielder Sergi Roberto leh goalkeeper Jasper Cillessen te chuan hliam vangin training an la zawm thei lo a, French defender Samuel Umtiti erawh a dam chiang tawh thung.
Neymar chuan, "He club-ah hian contract thar ka ziak thuai ang. Team kan inlungrual em em a, chhungkua ang maiin kan khawsa a ni. Engkimah kan inhriatthiam tlan avangin a nuam a, hnehna kan chan fo chhan pawh hi kan inkawmngeih vang a ni," tiin a sawi a, Celta an hneh loh hnua an match hmasa berah Neymar thusawi dik leh dik loh a hriat ang.
Madrid harh a hun
Real Madrid-in match thum chhung a zawna an khingpui an inhnehtawkpui hnuah coach Zinedine Zidane-a'n insiamṭhat an mamawh thu leh an thawh leh thuai tur thu a sawi a, a chil per pawh a la reh fel hman lo ang tih turah team tenau Eibar chu Santiago Bernabeu-ah an in-hnehtawkpui - zaninah an chak zo lo leh a nih ngat chuan Zidane-a hmabak a êng lo hle ang.
Marcelo-a'n Villarreal an draw ṭuma a hliam hnuah training a zawm leh tawh a, league match thum hnua Brazilian defender lo kir leh ta hi Real Madrid tan chanchin lawmawm a ni. Hetihrual hian Luka Modric, Casemiro, James Rodriguez leh Sergio Ramos te erawh hliam vangin an inlan theih a la beiseiawm lo a, anni ang player rual inlan thei lo hi chu eng team tan pawh chhiatpui tham a ni.
Zidane-a tana chanchin lawmawm erawh international break laiin Cristiano Ronaldo leh Gareth Bale ten ram tan goal khung an la thiam reng tih an pholang nawn a, French manager hian zaninah anni pahnih hi goal khung turin a beisei ang - khelmual pawn buaina vanga France-in an koh duh loh striker Karim Benzema a la awm cheu bawk.
Goal ven thiam Atletico
Tlarhnung ven an thiam avanga hriat hlawh Atletico Madrid-in tun season-ah league match sarih khel tawhin goal hnih chiah an la chhuah a, an tlarhnung hi eng team tan pawh tawn tlang an harsa - Granada ang team tan chuan a harsa lehzual ang.
Club tam zawkin an phun pui international break-ah Atletico-in an player pawimawh 15 ngawt ram tana inlan tura an chhuah a ngai a, Diego Simeone-a naute hian an hmabak ni 22 chhungin match ruk tehmeuh khelh tur an nei bawk. Team tam zawk tan buaina tham a ni.
Mahse, Atletico fan-te tana thu hriat nuam tak tur chu kum 2011-a Diego Simeone-a'n
Atletico a enkawl hnuah international break zawhah match 19 a hmachhawn tawh a, heng zinga match 15-ah hian hnehna chang zawk team-ah an ṭang thei. Zanina an mikhual tur hi table mawngphaha mi Granada an nih bawk avangin Atletico hian La Liga-ah hma an hruai chhunzawm zel a rinawm.