'Alex Ferguson: My Autobiography'

Ferguson hian lehkhabuah David Beckham a hralhchhuahna chhan chiang taka sawiin, England captain hlui hian anmahni enkawltu manager aia liana a inhriat tawh avanga hralh chhuak a nih thu a sawi a, an inkar boruak duhawm lo hi 2003 FA Cup-a Arsenal an hneh loh aṭanga a inṭan chhoh thu a sawi.

Sir Alex chuan, "Manchester United player reng rengin an manager aia lian emaw ropuia an inngaih tawh chuan an tan chhuah a hun tawh tihna a ni. Hetih hunlai hian David hian Alex Ferguson aia ropuiah a inngai a, hei vang hian a hun a tawp ta a ni," tiin a ziak.

Hetiang rilru a put avang hian an inkar boruak a ṭhat loh bakah celebrity emaw intia a nung chho chu a ngaimawh thu a sawi a, Spice Girls member Victoria Adams nen an inneih hnuah phei chuan he boruak hi a alh chhoh nasat thu a sawi tel bawk.

Ferguson chuan, "Ka player enkawl tawh zawng zawng zingah David chiah hi lar duh awm chhun a ni a, game pawn lamah tum lian tak neiin a rilru a pe. Hei hi ka ngaimawhin a ṭha ka ti ngai lo," a ti a, "Victoria nen an inngaizawng a, hei hian engkim a thlak danglam ta a ni," a ti.

Hetihlai hian a player ropui ṭhin hi a ṭhat lohna ringawt a sawi bik lo a, mi tam tak tan entawn tlaka a nun thu sawiin, "A hlawhtlinna hi a ropui a, khawvel ram hrang hranga naupangte entawn rawn nih hi a phu a ni," a ti tel bawk.

A lehkhabuah hian Beckham-a mit ko fuha ball boot a pet per chungchang ziak telin, "Kan inkar kha feet 12 vela hla niin ka hria. David khan ṭawngkam mawi lo tak hmangin min chhang a, kei ka thinrim nen a lam panin ka kal phei. Ka kal phei pahin chhuata boot lo awm kha ka chhuih phei a, kha khan a fuh ta mai a ni.

"Ni e, amah pawh he thil thleng avang hian a thinrim a, din pawh a rawn ding chhuak ve hial. Mahse player dangte khan khap betin an hau a, keichuan a teammate-te a tih hnual thu leh eng ang pawhin sawi buai mahse a thiam loh thu ka hrilh. A tukah koin a video ka en pui leh thlap a, mahse hetah pawh hian a thiam lohna a la pawm duh chuang lo. A tuk lehah kan chanchin hi press lamah a thang ta a, heta ṭang hian board hnenah David hi a chhuah a ngaih thu ka thlen ve nghal," a ti.

He thu a sawi rual hian United captain hlawhtling ṭhin Roy Keane-a chungchang sawi telin, Keane-a taksaa enkawl harsa lai ber chu a 'lei' a nih thu a sawi a, a taksa peng dangte thunun thei ṭhin mahse a lei a ven zawh ṭhin loh avangin vawi tam tak an buai phah thu a sawi tel bawk.

Ferguson chuan pound maktaduai 80-a Real Madrid hnena a hralhchhuah Ronaldo chu, "Cristiano hi player ka enkawl tawh zawng zawnga talent nei ṭha ber ka ti ngam hial ang. Player ṭha tak tak hi ka lo enkawl tawh a, mahse heng player ṭha ka enkawl tawh zawng zawngte hi a khum vek," a ti hial.

Ronaldo hi 2008 khan Real Madrid-in United aṭang hian leichhuah an tum a, amah pawhin Real-a kal hi a duh thu a sawi chhuak. Mahse Ferguson chuan heta a hralh lohna chhan hi sawiin, Real president Ramon Calderon-a chet danin a tih lungawi loh vanga hralh lo a nih thu a sawi.

Hetihlai hian Ferguson chuan Ronaldo chu hralhchhuah ai chuan amah leh amah inkah pawh a hreh loh thu a sawi hial a, mahse a intiam ang ngeiin a dawt leh kumah khawvela footballer manto ber ni turin a hralh chhuak ta a ni.