Nick Kyrgios pawisa an chawitir

Australian tennis star Nick Kyrgios chu Shanghai Masters khelh meka a nungchang mawi lo vangin mipa tennis lama thuneitu sang ber Association of Tennis Professionals chuan £13,533 (Rs.11,02,682.19) an chawitir.

Nilaini khan world number 14 Kyrgios hi ATP ranking-a 110-na Mischa Zverev lakah 6-3, 6-1 in a chak lo. Kha inkhelah khan Kyrgrios hi a chak dawn lo tih a chian hnuah a khel ṭha duh lo a, duhdah taka a service bakah a khingpui chu tham lo hmel takin a tih el vel, hei bakah hian umpire leh fans ṭhenkhat a inhnial pui bawk - inkhel entu lamin a chet dan hi an dem a, an auel hial.

ATP chuan, "Infiamna zahawmna vawnhim nan leh court chhunga nunchang mawi lo lantir avangin Kyrgios hi £13,533 (Rs.11,02,682.19) chawitir a ni," an ti.

Kum 21-a upa Kyrgios hi theihna sang tak nei niin khawvel huap pawha player beiseiawm berte zinga mi a ni a, tun thlatir pawh khan Japan Open-ah a champion. Mahse, tun hma lam pawhin a nungchang ṭha lo vang hian buaina a lo tawk fo tawh - a insiamṭha thuai a nih loh chuan a theihna sang tak hi a lo thlawnin a liamtir lo ang tih a sawi theih loh.