Juventus faktu Ronaldo

Christiano Ronaldo chuan Juventus chu khaw-vela club ṭha leh hlun berte zinga mi a ni nih thu leh an hmatawng Paulo Dybala leh Gonzalo Higuain te inkawp aia goal hmaa hlauhawm an awm chuan loh thu a sawi chhuak.

Serie A champion Juve hian nipui transfer lai khan an elpui Napoli aṭangin Higuain chu khaw-vela player manto pa-thumna ni turin an lalut. Season hmasa league goal 36 khung thei Higuain bakah hian player langsar Miralem Pjanic leh Dani Alves te an lalut bawk a, forward Dybala an neih bawk avangin Juve hi an hlauh--awm tih phat rual a ni lo.

Zawhna chhangin Ronaldo chuan, "Juve hian Serie A nomawi an kawl lai an humhim zel a nih pawhin a mak lo ang, a chhan chu anni hi Italy-a team ṭha ber an ni. An player en hian tlarhma lamah an ṭha rual hle a, goal khung kawngah harsatna an nei lo. Higuain hian season hmasa khan a theihna san zia a pholang tawh a, tun hma aṭang khan goal 30 chuang a khung thei tih hre tawh mah ila tunah chuan a ṭha lehzual tawh," tiin Spanish club tana a khelh pui tawh chungchang a sawi.

Juventus hian tun hnai kum nga chhung zet chu a zawnin league nomawi an la zawn tawh a, kuminah pawh match sarih an khelh aṭanga point 18 hmuin hmahruaitu an ni mek a, anmahni hnaih bertu Napoli lakah point liin an sang fal leh tawh zawk - zanin 12:15 hian Turin-ah Udinese an lo mikhual ang.