Cavani a dingnghet

Zlatan Ibrahimovic-a'n Manchester United a pan avangin Paris Saint-Germain chu striker thar lei tura beisei an ni. Hetihlai hian coach Unai Emery-a'n a neih sa Edinson Cavani a ringtawk a, tun thleng chuan Uruguay international hian a pu rinna a la ti thlawn lo.

French Ligue 1 champion PSG hian Real Madrid aṭangin Jese lalut mah se Spanish striker hi Paris-ah a vul thei rih lo. Tun season-ah striker Cavani erawhin inelna hrang hrangah a club tan match kua a khelh aṭanga goal 11 khung der tawhin zanin dar 8:00 a Nancy an lenchilh hunah pawh an innghahna tur a ni leh ang.

PSG coach hmasa Laurent Blanc-a'n kan khelh dan phung hian Cavani ṭhatna tak a pholang phak lo tia a lo sawi tawh kha a dik chho niin a lang. Ibra leh Blanc an awm loh hnuah Cavani theihna san zia a lang chho zel a - Napoli tan match 138 a khelh aṭanga goal 104 khung thei Cavani hi France club tan a vul mek.

Kum 29-a upa Cavani chuan, "Manager-in min ringtawk a nih chuan ka tan inkhelh a nuam a, khelmual chhungah ka
ṭhianten min ṭawiawm
ṭhat bawk avangin goal khung kawngah pawh ka tluang viau. Season hmasa lamah min sawiseltu awm ṭhin mah se ka buai phah lo a, tun hma lam aṭanga ka khelh dan phungah khan ka chiangin a ngaiin ka kal zel," tiin a sawi.