Ancelotti a lungngai lo

Bayern Munich manager Carlo Ancelotti chuan a naute khelh danah lungngaihna tur a awm loh thu leh international break zawhah hian ṭha zawka a inlan theih nghal theih a beisei thu a sawi chhuak.

Italian manager kaihhruiana hnuaiah German champion hian Bundesliga-a an match hmasa pangaah hnehna chang vekin Pep Guardiola hunlai aiin season bul an ṭan ṭha zawk.

Mahse, Bayern hian an match hnuhnung pahnihah beisei ang result an nei thei lo. Champions League-ah nikuma anmahni pet chhuak tawhtu Atletico Madrid lakah 1-0 in an tlawm a, league match-ah FC Cologne nen 1-1 in an inhnehtawk zui bawk. Zanin dar 7:30 hian fiahna hmachhawn turin Eintracht Frankfurt khelmualah an inlan ang.

Real Madrid leh Chelsea pawh lo enkawl tawhtu Ancelotti chuan, "Kan phu tawk ang zelin result kan nei ṭhin a, hnehna kan chan loh chhan pawh keimahni vang zel a ni. Tunah chuan lungngaihna tur a la awm lo a, international match khela zin chhuak ho an rawn haw khawm leh tawh, season bul kan
ṭan ṭhat anga ṭhain khelh chhuah leh kan tum ang," tiin a sawi.

Kum 57-a upa Ancelotti hian Bayern chu club dang aia danglam vaka a hriat loh thu a sawi tel rualin a tan Germany-ah zir tur a la tam thu a sawi tel bawk.

Ancelotti hian khawvel club lian leh langsar hrang hrang Juventus, AC Milan, Chelsea, Paris Saint-Germain leh Real Madrid te chu nomawi a lo chawi pui tawh a, tun ṭum hi Germany-a a hun hman vawi khatna a ni thung.