Premier League manager ropui ber Sir Alex Ferugson

Kum 78 mi Ferguson hian manager hna a thawh chhungin champion nomawi 49 a chawi hman a, November 6, 1986-a Ron Atkinson-a kut aṭanga United manager nihna a lak hnuah champion nomawi 38 a chawi bawk.

December 31, 1941-a Glasgow khawpui Scotland-a piang Sir Alexander Chapman Ferguson hi 1957 aṭang khan football khawvelah a zuang lut a, a pianna khaw club Queen's Park FC-ah bul ṭanin 1974 khan player anga a hun hnuhnung ber chu Scottish club tho Ayr United-ah a hmang. Player a nih chhung hian forward position-ah a khel ṭhin a, match 317 khelin goal 170 a thun hman a, a club ṭan ber Rangers tan 1967-69 chhung khan khelin game 41-ah goal 25 a thun bawk a ni.

Inkhelh a chawlhsan hnu hian 1974 khan kum 32 a nih laiin East Stirlingshire enkawl tura lakluh a ni a, he hna hi hnadang thawk paha thawk a nih avangin kar khatah pound 40 chiah a hlawh. Stirlingshire a enkawl tirh aṭang hian player-te chungah discipline a lekkawh ṭhat avangin hriat a hlawh nghal hat a, hetihlaia a forward Bobby McCulley chuan, "Tun hmain mi tumah hlauh ka ngei ngai lo a, mahse Ferguson hi chu kan club manager ni tura a rawn kal tirh aṭangin kan ṭih nghal," a ti hial. A season khatnaah Stirlingshire hi a chet ṭhatpui em avangin 1974-ah vek hian St. Mirren chuan an manager ni turin an sawm chhuak nghal a, 1974-1978 chhungin St. Mirren hi a enkawl.

Ferguson-a'n St. Mirren a enkawl tirh hian Scottish second division-a team vantlang pawl an ni pha chauh a, heta ṭang hian kaihruai chhoin 1977-ah chuan first division champion a nihpui thei. Mahse a hnuah a team enkawl danah club hotute an lawm lo a, 1978 khan a hna aṭang hian an ban. St. Mirren hi Ferguson-a managerial career chhunga a hna  aṭanga bantu awm chhun an ni.

Ban a nih kum hian Aberdeen a zawm nghal a, Aberdeen a enkawl lai hian Scotland national team a enkawl tel bawk. Aberdeen hi inelna lian tham hrang hrang 10-ah a champion pui a, Scotland-a a hlawhtlinpui bakah Europe thlengin champion nomawi a chawipui.

Aberdeen-a a hlawhtlin avangin hetih hunlaia English club vantlang pawl Manchester United chuan November 6, 1986 khan an manager ni turin Old Trafford-ah an lalut a, hetihlai hian United hi table-ah 21-na an ni. A luh tirh aṭangin an player zinga zu in nasa Norman Whiteside, Paul McGrath leh Bryan Robson-te a bitum nghal a, discipline khauh tak hnuaiah season a zawh meuh chuan United hi 11-na a nihpui.

United-a a hun hmasa lamah hian a hlawhtling nghal lo a, a enkawlna hnuaia United game hmasaber chu November 8 kha niin Oxford United chu 0-2 in an hneh lo. Hemi season-ah hian United hi away-ah an chak hleithei lo a, Ferguson-a enkawlna hnuaiah pawh an away result-in hma a sawn thei meuh lo. Mahse a enkawlna hnuaia away game-a an chakna hmasa ber ni turin December 26 (Boxing Day)-ah Liverpool an hneh hlauh mai a, heta ṭang hian an insiamṭha chho ṭan a ni.

1987-88 season-ah hma a sawn pui nasa hle a, mahse league-ah point kuaa Liverpool tluk loin pahnihna an ni. 1988-89 season-ah an hnungtawlh leh hret a, pahnihna  aṭangin table laihawlah an tla thla leh. 1989-1990 season hi Ferguson chuan football khawvel a chen chilh chhunga a hun thim ber lai niin a sawi hial a, season tawpah relegation zone chung chiahah awmin an him hram. Season tawp lamah game riatah vawi ruk chak loin vawi hnih an draw a, hei vang hian beih a tawk nasa a, Old Trafford chhungah United supporter-te chuan "Three years of excuses and it's still crap ... ta-ra Fergie," tih inziak banner kengin chhuak tura an duh thu an au chhuah pui a ni.

Hemi hnu hian Ferguson hi an ban tawh ngei tura ngaih a ni a, FA Cup third round-a khel ṭha tluang Nottingham Forest hmachhawn tur an nih avangin chak lo tura ngaih an ni a, an chak loh zawhah Ferguson hian banna lehkha a dawn an ring. Mahse rin loh takin Mark Robins-a goal hmangin 1-0 in an chak hlauh mai a, mi tam tak chuan he goal hi Ferguson-a himna goal an ti hial. Sawiselna hnuaiah huaisen taka beiin 1992-93 season-ah a vawikhatna'n league-ah a champion pui a, heta  ṭang hian hawi kir zai a rel tawh lo.

Ferguson hi pa ṭawng duh leh chanchin ngah tak a ni a, a autobiography-a Gordon Strachan a rin loh thu a sawi te, David Beckham nena an inkar thu te, 2003-a United-a shareholder lian ber John Magnier a khin dan te, BBC interview a hmachhawn duh loh chungchang te, Preston North End-in a fapa Darren Ferguson an ban avanga an player hawh tir a koh let leh daih thu te, referee a sawisel avanga hremna a hmachhawn zawng zawngte leh football khawvela mind game khelh thiam ber pawl a nih dante hi thui tak sawi tur a awm.

Kum sarih liam taa Sir Alex Ferguson-a'n a chawlh tur thu a puan khan United thlen chin a thlirin a lungawi thlak thawkhata a hriat thu a sawi a, a zawm tirha English club vantlang pawl kha English club hlawhtling berah a hlang kai a, Europe-ah vawi hnih a champion pui bawk a, tunah dinhmun nghet taka an din laia a ban san hi a tih tur dik tak nia a hriat thu a sawi.

Ferguson chuan, "Tunah hian infiamna khawvela training hmanraw nei ṭha ber pawl kan ni a, kan home ground Old Trafford hi stadium ropui leh lian ber pawl a ni bawk. He dinhmun ka thlen theihna atana min thlawp tlattu ka chhungte chungah ka lawm a, an mi hmangaihna leh ka lama an ṭan tlat ṭhinna hian chakna min pe a ni. Manager hna ka thawh chhung zawngin ka nupui Cathy hi mi pawimawh tak a ni.

"Ka player leh staff zawng zawng, tuna awm mek leh kal tawhte pawh an chungah ka lawm a, hlawhtlinna hrang hrang min thlen puitu mi pawimawh an ni a, football team mai ni loa football club ropui kan din theihna atana mi ṭangkai tak an ni.

"Fans-te chungah lawmthu sawi sen loh ka ba a, an chungah ka lawm takzet. Kum kha leh chen a chhia a ṭha kara min thlawpna kha a ropui ka tiin ka phu lo hialin ka hria. In club hmangaih leh ngaihhlut em em kaihruai theia ka awm hi chawimawina nasa takah ka ngai a, Manchester United manager hna chelha ka awm chhung hi ka nuna ka hun ngaih pawimawh berte zinga mi a ni kumkhua ang," tiin United a chhuahsan.