Sir Alex Ferguson-a'n NHS a fak
Manchester United manager hlui Sir Alex Ferguson chuan coronvirus dona kawnga National Health Service (NHS) chet dan chu a fak a, kum hnih liam taa a nunna chhahimtute an nih avangin a fak tel bawk.
Ferguson chuan, "Tunah chuan NHS hlutzia kan hre chho zel hi a lawmawm hle. Kum hnih liam ta khan ka nunna min chhanhim a, tun ṭuma coronavirus laka an hmalakna pawh hi a chhuanawm hle a ni. NHS bakah hian club leh British mipuite ṭanpui ngaite an ṭanpui danah hian ka lawm hle a ni," tiin a sawi.
Sir Alex hi thluaka thisen zam chat (brain haemorrhage) vangin May 2018 khan ni li chhung Salford Royal hospital ICU-ah dah a ni a, hun harsa tak a patlang hnuah ngai a awh leh tawh. Ferguson hian Manchester United-in NHS an puih zel tur thu a sawi nghal bawk.
Manchester United club foundation chuan NHS hnathawk mi 3,500 hnenah thilpek an hlan a, Salford Royal hospital hnenah medical hmanrua chi hrang hrang an pe bawk. United hian an hnuaia thawkte chu an chhevela mite tana che chhuak turin an fuih a, Old Trafford chu a ṭul dan a zirin thisen pek theihna hmun atana duan zingah a tel.
United captain Harry Maguire chuan, "NHS leh damlo tana thawktute inpekna a fakawm awm a, mipui kan ṭanrualna hi a lawmawm. Kan thawhhona a ṭhat phawt chuan hun harsa hi kan patlang ngei ang," tiin a sawi ve bawk.