India squad-ah Edmund-a ko

Blue Tigers coach Manolo Marquez chuan India probable squad a puan hnuah Edmund Lalrindika a ko ve leh a, damlohna avanga inhnukdawk, Chennaiyin forward Irfan Yadwad aiah koh a ni.

Edmund-a'n India squad a zawm ve leh dawn tak avangin Blue Tigers probable squad-ah Mizoram player pali an awm tihna a ni a, Edmund hma hian Mumbai City captain Lallianzuala Chhangte, Mohun Bagan midfielder Lalengmawia Ralte leh FC Goa midfielder Ayush Chhetri te chu koh an lo ni tawh.

Edmund hi Inter Kashi tan khel mekin, I League club aṭanga koh awmchhun a ni tihna a ni a, season hman zawh takah khan inelna hrang hrangah match 24 khelin goal li a khung a, assist vawi ruk a nei bawk.

Lunglei tlangval hian ram tan match nga a khel ve tawh a, Blue Tigers coach hlui Igor Stimac khan June 2024-ah khan ram tan a vawi khat nan a ko a, Manolo hian a ko chhunzawm ve leh bawk a ni.

Blue Tigers hian May 18 aṭangin Kolkata khawpuiah training an nei ṭan dawn a, tun international break-ah hian friendly match bakah AFC Asian Cup 2027 Qualifiers third round match an khel ang.

Friendly match-ah hian Thailand chu June 4 hian khualmualah an hmachhawn dawn a, June 10-ah qualifier match khel turin Hong Kong an lenchilh leh bawk ang.

AFC Asian Cup 2027 Qualifiers final round-ah hian group tina pakhatna ṭheuh chu Asian Cup khel tura tling tur an ni a, India hi group C-ah Hong Kong, Bangladesh leh Singapore te nen an awm ho.

India hian an match hmasa berah Bangladesh an inhnehtawkpui avangin point khat chauh an la nei a, mahse, Hong Kong leh Singapore an inhnehtawk ve tho avangin point khat ṭheuh an la nei.