Champion tawh Ramhlun South leh Kanan an chak

CYMA Football-ah hian champion tawh team 11 an awm a, nimin khan champion tawh team pathum an inlan. Nimin inkhelah Armed Veng bakah Ramhlun South leh Kanan Veng ten hnehna an chang.

Ramhlun South-in Airfield lakah 12-1 in hnehna an chang a, kawng engkimin inkhel an thunun. Kerala Blasters Lalthanmawia'n hattrick a siam a, Mizoram striker Malsawmfela pawhin goal a khung. Chutihrualin goal khung tam ber erawh India sub junior team-ah pawh tel tawh Lalremruata (Bata) a ni a, Bata hian goal nga a khung.

Kanan Veng tan COE chhuak Jojo Zahmingthanga a che ṭha a, South Sabual 7-3 in an hneh. Kum 2007 champion Kanan Veng tan hian Joseph ZD Lalfakzuala'n hattrick a siam a, Josua ZD Lalruatfela'n goal hnih a khung bawk.

Tun ṭum inelnaah hian champion tawh team 11-te an tel vek. Kum 2000-a champion Zotlangin Kawnpui Bangla Veng 1-0 a hneh loin an tla tawh. Team dang Armed Veng, Chaltlang, Chanmari, Dinthar, Electric Veng, Kanan Veng, Lengpui, Ramhlun South, Ramthar Vneg, Republic Veng leh Venghnuai te an la dam vek.