Silly Point : El Clasico kartawp
Tunlai chu infiamna khawvel kutpui kan hmang a ni ber mai. Football lamin UEFA Champions League semifinal hmuhnawm tak pahnih min hlui hnuah, Spanish La Liga champion tur zawnna ni ber tawh ang, El Clasico chu kartawpah khelh a lo ni dawn bawk.
NBA lamah Playoffs semi final-a seed hniam zawk team paliten round 1-na a hnehna an chan vek ṭum a lo thleng bawk. Mizoram lamah CYMA Football khelh a ni mek. Chawm i la, hawp bawk ang hmiang.
IPL Clasico
Nizan lam Punjab Kings leh Delhi Capitals te chak zawk kan hre hman ta lo a. Delhi an chak lo a nih chuan Playoff thlenna kawngkhar a inkhar kan ti thei tawh ang a, Punjab table chhipah an awm thung ang.
Delhi an chak a nih erawh chuan round 13 leh 14-na chho hi chu team parukte tan quarterfinal a ni deuh tawp tawh mai dawn a ni. Zanin lamah Lucknow Super Giants-in Royal Challengers Bengaluru an hneh loh chuan, LSG tan playoff mangṭha kan ti thei ang a, RCB erawh Playoff chiangsa a ni thung dawn.
LSG an chak erawh chuan playoff khelh theihna chance zau takin a inhawng ang a, RCB lam dinhmun a chiang lo leh sawt thung ang. Pathiannia Punjab Kings leh Mumbai inkhuainuai tur leh Gujarat Titans leh Delhi Capitals-in knockout round ang deuh thaw an intum tur te hlei hlei hi, Classico kartawp ka ti lo thei lo.
Tawlhthlu, ṭhangharh & irhfiak
Kolkata Knight Riders tan chhiarkawp dan hmangin playoff luh theih dan la awm mah se, mahni khelmualah home advantage neih a hnekin an chak lo ngun lutuk.
Nizan hmasa Chennai Super Kings laka an tawlhthlukna kha an thawhchhuahpui tawh loh hmel hle. League stage chanve lama ṭhangharh Mumbai Indians te, an inkhelh hnuhnung bera Gujarat laka an irhfiak zeuh kha a pawi thui thei viau bawk ang.
Delhi Capitals erawh league stage chanve hma an tluk lo hle, top gear hmang nasa lutuk, petrol tlan kang ang maiin an khawsa ṭan. Ṭum thum a zawnin chak ni hmel an hmu ta lo.
Heng KKR, LSG, DC leh MI te hi playoff an thleng zo lo a nih ngai chuan, tumah mawhpuh tur an nei lo, anmahni thiam loh tih erawh huai takin ka sawi ngam.
Destiny's Child
Beyonce te, Kelly Rowland te chanchin sawi tum erawh ka ni lo. Mahse team tla chiang tawh patahumte tih loh, tuna pasarih la awm te hi, kum 2025 IPL Playoff hmun ruak pali luah tur zinga an tel ve dawn a nih ngai chuan an hma hun (destiny) hi anmahi kutah ṭheuh a innghat.
A khel ṭha apiang, a chak zawk apiang an lut tawh mai dawn a ni. Kan tleirawl laia cowboy luh kan tih ang kha a ni ta deuh ber awm e. Cowboy luh erawh a lehpek atan kan khek ang. Kartawp hman nuam vek u le.
