Liverpool-in Kevin de Bruyne an dawr!

Premier League club Liverpool chuan free transfer-a Trent Alexander Arnold chân thei dinhmuna an din hnuah, free transfer veka player class sang lakluh ve an tum dawn - a hming chu Kevin de Bruyne a ni.

Manchester City legend hian season tawp rualin Etihad Stadium a chhuahsan tawh dawn a, a club khelhna tur an inrinsiak mek laiin Reds chuan KDB hi Anfield-a khel turin contract an zawrh niin an sawi.

Italian journalist lar tak Gianluca Di Marzio chuan Liverpool-in KDB an dawr thu hi a puang a, he thu buatsaih a nih lai hian Reds-in an dawr ngei leh ngei loh chiang taka sawi theih erawh a la ni lo.

City lamin KDB hi contract thar zawrh lo mah se, amah duhtu erawh a la haihchham lo hle a, Liverpool bakah hian Serie A hmahruaitu Napoli, MLS leh Saudi Arabia lam sawi rik a ni bawk.

Napoli maw?

Antonio Conte enkawlna hnuaiah Napoli-in an vanglai an tawng chho leh mek a, Serie A-ah hmahruaitu niin, champion thei dinhmunah an ding mek - pahnihna Inter Milan aiin point thumin an sang zawk mek.

Serie A club-ten match thum ṭheuh bak khelh tur an nei tawh lo a, Napoli hian match hautak khelh tur an neih tawh loh avangin an tan champion-na chance a sang tawh hle.

Season thar atan rilru an seng ṭan zui a, KDB lam an hawi. Napoli-ah hian Belgian striker Romelu Lukaku a awm mek a, Italian club hian Lukaku hian ram tana a khelhpui, a ṭhianpa KDB hi a thlem luh theih an beisei.

Hetihrual hian KDB hian a naupan laiin Liverpool a ṭan ṭhin a, City midfielder hian a club ṭan em em tana khelh a, Premier League khelh chhunzawm pawh a châk mai thei.

MLS lam

KDB hi Major League Soccer nen pawh sawi zawm a ni a, mahse, amah hnim hnai bertu Inter Miami chuan dawr lo mai turin thutlukna an siam. MLS hian dan danglam tak an nei a, Miami club hian an 'discovery list' ah KDB hi an dah.

Club-in discovery list-a player an dah chuan MLS club dangin an list-a player chu an lo dawr ve thiang lo tihna a ni a, mahse, Lionel Messi, Luis Suarez leh Sergio Busquets neitu club hian KDB lam an hawi ta lo niin a lang.

Hetiang a nih avang hian KDB duhtu zinga mi Chicago Fire chuan Belgian midfielder hi an dawr thei dawn tihna a ni a, anni hi US coach hlui Gregg Berhalter-a enkawl niin, player langsar vut sawi tur an nei lo.

Khawthlang media ṭhenkhat chuan Chicago thuneitute chuan KDB aiawhte nen indawrna an kalpui dawn niin an sawi a, an la lut thei a nih ngat chuan MLS tan chuan chanchin lawmawm a tling ang.

Saudi beiseina

Cristiano Ronaldo, Karim Benzema, Sadio Mane, Roberto Firmino leh player langsar tam takin Saudi-ah football an khel mek a, KDB pawh hi middle east ram lam hawia puanthuah tel ve mai tur anga sawi thawm a awm hman.

Saudi Pro League-a sporting director hna chelh mektu Michael Emenalo hi kum 2012-a Chelsea-a KDB la luttu kha a ni bawk a, tun hma thil thlengte avangin Saudi lam hi a hawina chance a sang hman viau.

Hei mai a ni lo. Saudi lam club aiawhte leh De Bruyne aiawhte chu an lo indawr tawh bawk a, mahse, amah ber hian sum tam ringawt mah se, Saudi-a khawsak hi a châk lo nia sawi a ni.

KDB hian Europe-ah a cham chhunzawm lo a nih pawhin USA lamah kal a duh nia sawi a ni a, Saudi Pro League club tan thlem luh a harsa dawn niin a lang.

Chawlh maw?

BBC sport columnist Guillem Balague chuan KDB hi chawl mai tur angin a sawi hman a, hetihlai hian, Belgian football expert Kristof Terreur chuan hei hi a pawm ve lo.

Terreur chuan, "KDB hian World Cup 2026 khelh a tum. Mahse, tun hnaiah hliam a nei ngun a, hei vang hian a fimkhur. Pressure tlem deuhna leh, a khelh tam theihna tura kal a duh a, World Cup atan fit taka awm a duh," a ti.

Kristof Terreur-a ṭawngkam aṭang chuan KDB tan World Cup thlengtu tur ram, USA lama kalna chance a sang hle - Liverpool-ah chuan pressure a sang dawn tih a chiang a, Napoli-ah pressure nep deuh mah se, Serie A game sawi nep theih a ni lo.

KDB hi kum 33 chauh a la ni a, City-in contract thar an zawrh lo chu mak a tih thu a lo sawi tawh. Mahse, tun season-ah City tan match 36 khelin goal ruk a khung a, assist vawi riat a nei - tun hma ang chu a ni tawh lo tih a chiang.