CYMA Football 2025-ah Serchhip Field Veng an hrem

22nd Inter Branch YMA Football Tournament-ah inelna buatsaihtu CYMA leh MFA ten player endik an uluk a, dah bawhchhe chungah pawh hremna an lekkawh na hle. Nimin khan Organising Committee chuan player dik lo chhawrtu Serchhip Field Veng chu an chak loh tir a, an hneh tak Ramhlun Vengthar chu chakah an puang thung.

May 7, Nilaini khan Serchhip Field Veng chuan 1st Bn MAP Ground-ah Ramhlun Vengthar 7-0 in an hneh a, tun inelna team ṭha zinga mi an ni. Mahse, Serchhip Field Veng Branch tan bul ṭantu zinga mi Laltluangpuia, Chhingchhip khua chu F. Lalrindika Voters ID hmangin a khel tih hriatchhuah a ni. Inelna dan angin Serchhip Field Veng chu chak loa puan an ni.

Nimin khan inelna buatsaihtute chuan Ramhlun Vengthar hnenah pawh lehkha thawnin chaka an puan thu an hrilh a, second round atana inbuatsaih turin an hriattir. Ramhlun Vengthar hian May 15, Ningani chhun dar 12:15 hian RG Stadium-ah Republic Vengthlang an hmachhawn ang.

CYMA Football 2025-ah hian player endik nan Voter ID hman a ni a, vote la nei lo tan Aadhaar Card hman niin Aadhaar Card thlawp nan hian Aadhaar card-a hming inziak Voter ID emaw ration card emaw digital birth certificate hman a ngai a, inelna ṭan hma hian player-te lehkha pawimawh hi endik vek a ni bawk.