Champion lai Venghnuai inlan hun

LBS Suzuki 22nd Inter Branch YMA Football-ah vawiin hian champion lai Venghnuai an inlan dawn a, nomawi an chawina hmun RG Stadium-ah Lungdai an hmachawn dawn. Vawiin hian RG Stadium-ah chauh inkhel a awm dawn a, match thum chauh a awm ang.

Venghnuai hi champion lai an nih avangin tun ṭumah hian seeded no. 1 chu an ni ngei a, group A-ah awmin a chung berah awm mah se champion rinkai an ni pha lo. An khingpui tur Lungdai erawh sulhnu la nei ṭha lo mah se tun ṭumah hian team vantlang chunglama ngaih an ni.

Lungdai hian an match hmasa berah New Serchhip Venglai 4-1 in an hneh a, man of the match-ah I League 2-a Diamond Harbour champion puitu Lalngaihsaka an thlang. Ngaihtea ringawt hi Venghnuai tan buaipui tham a tling dawn a, tualchhung football-a tawnhriat nei ṭha Lalbuatsaiha te an awm bawk avangin Venghnuai tan goal venhim ṭhat a pawimawh ang.

Match hmasa berah Hmuntha leh Ramhlun Venglai te na inkhel dawn a, match hnihnaah Chhuanthar Tlangnuam 1 leh Tlangpui te an inkhel zui ang. Team dang palite hi an vawi khat inlanna tur vek an ni a, Tlangpui hi mit la deuh ber tura ngaih an ni.