FWA Footballer of the Year-ah Salah an thlang

Liverpool thiampuipa Mohamed Salah chu Football Writers’ Association (FWA) Footballer of the Year-ah thlan a ni a, vawi thum a dawnna niin, he award dawng hnem ber Thierry Henry a nih rual.

Hmeichhe lamah chuan Arsenal striker Alessia Russo chuan he chawimawina hi a dawng a, tun season-ah match 39 khela goal 20 khung tawhin, assist vawi li a nei a, Gunners chu Women's Super League-ah pahnihna nihpuiin, Champions League final an la hmabak bawk.

Salah hian kum 2018 leh 2022 pawh khan he chawimawina ngaihhlut hlawh hi a lo dawng tawh a, FWA member 918-in vote an thlak aṭangin 90% a hmu phak - kum 2001 hnu lama vote hmu hnem ber record a siam.

Salah dawtah hian club tana a khelhpui Virgil van Dijk chu pahnihna a ni a, Newcastle United striker Alexander Isak leh Arsenal midfielder Declan Rice ten an dawt leh bawk.

FWA chair John Cross chuan, "Mo ang em ema he award dawng tura vote hmu hnem fal hi an la tam lo hle. Hei hian season duhawm tak a hmang tih a tilang chiang hle a, Reds-in league nomawi 20-na an lak theih nana player thawhhlawk tak a ni," a ti.

Kum 32 mi Salah hian tun season-ah Reds tan league match 35 khel tawhin, goal 28 leh assist 18 a nei a, Premier League-a match 38 khelh a nih hnua season khata goal thawk chhuak hnem ber record a siam.

Anfield-a kum hnih dang cham tura contract thar ziaktu Salah hian tun season inelna hrang hrangah match 49 khelin goal 33 a khung a, assist vawi 23 a nei bawk.

Liverpool hian Pathianni zan dar 9:00-ah league match khel turin Arsenal an mikhual dawn a, Champions League semifinal-a chak lo hlim Gunners hian guard of honour an pek a ṭul dawn.

Reds hian an champion hnuah Chelsea hmachhawn tawhin, 3-1 in an ngam lo a, Arsenal lakah an tlawm leh a nih chuan champion tawh mah se, an tan mualphona a ni ang.