City beisei Wirtz-a'n chhuah a hnial lo

Manchester City nena sawizawm hlawh mek, Bayer Leverkusen attacking midfielder Florian Wirtz chuan chona thar hmachhawn tura chhuah a hnial loh thu a sawi chhuak a, City hian an club legend chhuak mai tur, Kevin De Bruyne hmun ruak luh turin an duh niin an sawi.

Wirtz chuan, "Club tam takin min duh tih hriat hi a lawmawm takzet a, Germany leh Europe-a club ṭha ber berte tana khelhna chance ka nei hian min tihlim hle. Leverkusen-a ka khelhpui, an chhungte kalsan a, South America leh Africa aṭanga lo kalte hi ka zah em em zel.

"Keipawh anmahni ang tho a, ka nuam tihna sa ringawta cham reng lo a, thil thar hmachhawn chu ka châk ve khawp mai. Footballer ho nih phung chu ka hrechiang ve a, khawi hmunah pawh kal mah ila, ka buai ka ring lo," a ti.

Wirtz hi Bayern Munich leh Real Madrid pawhin an duh nia sawi a ni a, Leverkusen hian pound maktaduai 150 aia tlawma hralh an tum lo. Bayern nen hian an sawi zawm viau a, mahse, a ṭawngkam aṭanga thlir chuan ram danga kal a châk niin a lang.

Kum 22 mi Wirtz hi Bayern player Jamal Musiala nen inkawmngeih tak an nih avangin, Vincent Kompany-a team hi pan mai tur anga sawi thawm a awm hman.

Mahse, Wirtz chuan, "Season thara ka khelhna tur an ziahte pawh ka lo chhiar ve ṭhin a, ka nui tawp zel," a ti - Bayer-ah hian kum 2027 thleng contract a nei a, tun season-ah match 43 khela goal 16 khungin, assist vawi 13 a nei.

Tun season-a beisei phak lo City hian season tharah inthuamṭhat an tum viau a, mahse, Champions League an khelh dawn leh dawn loh pawh a la chiang lo.

Premier League-ah top five chinin UCL an khel dawn a, City hi pathumna ni mek mah se, UCL beisei zinga mi, pasarihna Aston Villa aia an sanna hi point li chauh a ni. Match thum khelh tur a la awm a, vawi khat chetsual a pawi thei - Pep-a naute hian zanin dar 7:30-ah tla tawh Southampton an lenchilh ang.