Bayern-in nomawi chawi dawn

German champion Bayern Munich chuan zanin dar 10:00-a league match an khelh zawhah Bundesliga nomawi an chawi tawh dawn a, Harry Kane-a'n a career-a a vawi khat nan champion nomawi a khawih ve dawn tihna a ni!

Bayern hian kar hmasa khan RB Leipzig chu 3-3 in inhnehtawkpui mah se, anmahni hnaih bertu Bayer Leverkusen-in SC Freiburg chu 2-2 a an inhnehtawkpui ve leh avangin um phak theih an ni ta lo a, an champion.

Zanina an league match khelh turah Bayern hian Borussia Monchengladbach an mikhual dawn a, match khat dang la bak dawn mah se, an home match hnuhnung ber tur a nih avangin Bundesliga nomawi hlan nghal an ni ang.

Hetihlai hian season tawpa club chhuahsan tur Thomas Müller tan an khelmuala Bayern jersey nena a inlan hnuhnung ber tur a ni bawk a, kum 25 zet Allianz Arena-a a cham hnuin Muller-a contract chu pawhsei a ni lo.

Muller hian Bayern tan Bundesliga nomawi 13 zet a chawi a, DFB-Pokal (6), DFL-Supercup (8), Champions League (2), UEFA Super Cup (2) leh FIFA Club World Cup (2) nomawi a chawi hman a, match 749 inlansakin, goal 248 a khung a, assist 274 a nei bawk.